Ӱдырамашлан лӱмлымӧ пайрем

Ӱдырамаш-влаклан эр гычак усталык площадка-влак пашам ыштеныт. Нуно Уфа гыч толшо кардиолог, гастроэнтеролог да моло специалист деч кӱлеш каҥашым налын, стоматологий комплексын услугыж дене пайдаланен кертыныт. Ӱдырамаш-влаклан оҥай мастер-классым эртареныт, больницыште тазалык, еш илыш нерген тӱрлӧ лекцийым лудыныт, мастар-влак макияжым, причёскым, массажым ыштеныт. «Защитники Отечества» фондын специалистше, психолог-влак СВО-н сарзыже-влакын авашт, пелашышт дене мутланеныт, пайдале ой-каҥашым пуэныт. Тӱвыра пӧртын фойештыже выставкым сӧрастарыме ыле. Тушто возалташ организатор-влак чапле фотозоным вераҥденыт. Мультиинструменталист, Zainetdin этношоу проектын солистше, Башкортостанын калык артистше Загир Зайнетдиновын концертше ӱдырамаш-влаклан кугу пӧлек лие. Ялыште илыше ӱдырамаш-влаклан «Территория женского счастья» проектыш логалаш - кугу пиал.