2025-ше ийыште Башкирийын Правительствыже кузе пашам ыштен

Чылажат сеҥымаш верч

Правительствын кодшийсе ик эн тӱҥ задачыжлан СВО-н участникше-влаклан да нунын ешыштлан полшымым шотлыман. Республикыште эше 12 тӱрлӧ полышым пуаш тӱҥалме, кызыт чылаже 55 тӱрлӧ полыш уло. Тидлан кок пачаш шукырак оксам кучылташ палемдыме. Мӧҥгӧ пӧртылшӧ ветеран-влаклан поснак кугу тӱткылыкым ойырат.

«Тыге мӧҥгӧ пӧртылшӧ 78 процент салтаклан паша верым муаш полшымо, 86 процентше диспансеризацийым, чырык утлаже реабилитацийым мучаш марте эртеныт, 45 процентшылан психологический полышым пуымо», - каласен Андрей Назаров.

Башкирийыште дрон-влакым шке лукташ тӱҥалыныт. 2024 ий август годсек салтак-влаклан 11,5 тӱжем беспилотникым колтымо. 

Премьер сарзыеҥ-влаклан ончыкыжо эше чотрак полшаш, радиоэлектрон кучедалмаш средствылан, кӱкшӧ технологиян оборудованийлан, снаряжений ден экипировкылан кугурак тӱткылыкым ойыраш сӧрен.

Образований да наука

2025-ше ийыште образованийлан 122 млрд теҥгем кучылтмо. Кум у школым почмо, 35 школым, кок йочасадым да кок колледжым ачалыме. Нагаевыште йочасадым, Уфаште республикысе талантан икшыве-влакым туныкташ математический интернат-лицейым чоҥаш тӱҥалыныт. Башкортостан вуйлатышын шӱдымыж почеш икымше гана туныктышо-влаклан санаторий ден курортлаште эмлалташ сертификатым пуэныт, ялласе школ директор-влаклан грантым ойыреныт.

«Ме федеральный гына огыл, региональный кӱкшытыштат шанче сферылан финанс полышым кугемден толына, - палемден Андрей Назаров. - Республикылан 1 млрд теҥге федеральный субсидийым налынна, РФ-н Наука да кӱшыл образований министерствыжын грантше-влак 1,7 млрд теҥгем эртеныт. Шымлымаш пашалан да самырык шымлызе-влакым кумылаҥдаш республикын бюджетше гыч 850 млн теҥгем ойырымо».  

Уфаште студент кампусым чоҥымо паша сайын ворана. Республика вуйлатыше-влакын шонымышт почеш, тудо талантан самырык еҥ-влакым ушен шогышо вер, инноваций да технологий-влак рӱдер лиеш.

Медицинылан - 125 миллиард теҥгем

Тазалыкым аралыме пашам вияҥдаш, оборудованийым налаш, кадр йодышым решатлаш кодший республикыште 125 млрд теҥгем ойыреныт. Тушеч 5 млрд теҥге утлажым поликлиника-влакым уэмдаш кучылтыныт. 137 модульный ФАП-ым ыштеныт. Тиде показатель дене Башкирий Юл кундемыште икымше верыш лектын. Башкирийыште икымше гана аза колымо показатель 3,2 промилле марте волен, тидыже, А. Назаровын мутшо почеш, элысе кокла показатель дечат (3,6) ӱлышрак, тудым тӱнямбалсе вӱдышӧ эл-влакын кӱкшытышт дене таҥастараш лиеш.

Уфаште сар ветеран-влаклан госпитальым чоҥымо ак 28 млрд теҥгеш шуэш. Кугурак ужашыжым федеральный бюджет гыч ойырат. Кызыт финанс йодышым шотыш кондат. Ончыкылык госпитальын проектше кугыжаныш экспертизым эртен, тудлан мландымат ойыреныт. 400 койко-веран госпитальым кок-кум ий гыч чоҥен шуктынешт.

Экономикым вияҥдымаш

2025-ше ийыште валовый региональный продуктын - республикыште ыштен лукмо чыла сату ден услугын акышт 3,2 трлн теҥгеш шуын. Вич ийыште промышленный производство 23 процентлан (Российыште - 18,8 процентлан) кушкын, тудлан 800 млн утла теҥгем ойырымо. Тидыже экономика кушмым да вияҥмым ончыкта!

Республика аграрный регион семынат йол ӱмбалне пеҥгыдын шога. Ял озанлыкысе валовый продукцийын кугытшо 6,8 процентлан (Российыште - 4,9 процентлан) артен да 290 млрд теҥгем эртен. Регион тӱҥ кочкыш-йӱышым шкаланже шке ситара.

Республикыште шым ий годсек инвестиций чарныде ешаралтеш. Кодший инвестор-влакын надырышт 1,7 процентлан кугемын да 852 млрд теҥгем эртен.

Регионышто чумыр пашадымылык (1,6%) элысе деч ӱлышрак. Тылзаш кокла пашадар 10 процентлан кушкын да 74 тӱжем теҥгеш шуын.

«Ме социальный сферылан кучылтшаш федеральный дотацийым да субсидийым палынак кугемденна. Чумыр ончымаште регион ончылно шогышо задача-влакым сайын шуктенна. Умбакыже тылеч ончычрак палемдыме тӱҥ задача-влаклан кугурак тӱткылыкым ойырена. Тиде специальный военный операцийлан полшымаш да республикылан икшырымын вияҥаш йӧным ыштымаш». 

Радий Хабиров, Башкортостан Республикын Вуйлыкшо.