4 апрель - Интернетын тӱнямбал кечыже. Интернет - пазар?

А тушто!.. Эр пазарысе гай. Эрдене пазарыште лийында? Шылым ужалыме верыш пуренда? Тушто пеҥгыде кап-кылан пӧръеҥ-влак кугу товарым кучен коштыт:

- Мый шылым тыге руэн кертам…

- А мый тыге… 

Интернет кумдыкышто уверым кычалшыжат тыгаяк:

- Мыйын нейросеть…

- Мыйынат искусственный интеллект…

Туге гынат кажнынан тыгай кычалшына икте: кӧ «Яндексым» йӧрата, кӧ - «Гуглым», кӧ - «Майлым», молымат. А нуно чыланат икгай кычалыт? Уке, тӱрлӧ семын.

Тидым палаш мый Тошто Балтач села воктене верланыше Тузлубино ялым нальым. Тиде ялым марлаже «Актерыш» маныт. «Актерыш» мутым возена гын, мыланна нимом кӱлешым муаш ок лий. Садлан, ожсо архив кагазысе «Актарыш» лӱмжым возышым. 

Лектышыже тыгай лие:

«Рамблер» кычалше ресурс ондак «Окмак от ул?» манын палдараш йодеш.

Ожно школышто тунемше-влак экзаменым кучат ыле. Мемнанат экзаменым кучымо жапыште ик илалше туныктышо мыланна тыге ойлыш:

- Йоча-влак, тыланда тидым палыде ок лий. Илышыштыда экзамен шуко лиеш, но те нунын деч ида лӱд. Экзаменысе йодышлан тичмаш вашмутым муаш да раш ойлен пуаш пеш йӧсӧ. Неле йодыш логалеш гын, тиде тема дене мом паледа, тушеч ойлаш тӱҥалза. Тӱҥжӧ - чарнен ида шого. Чарнеда гын, «Тудо темым ок пале» манын умылен кертыт. Южо туныктышо тидым умыленат ок шукто, паледа манын шона. 

«Яндекс» кычалшынат политикыже тыгайрак. Актарыш ял олмеш я колорад копшаҥге деч «Актара» лӱман эмыш «наҥгая», я Актаныш олашкат «кудалта». «Актерище» сериалышкат «миен лектат». Иктаж уверым «Яндекс» полшымо дене кычалаш гын, мом кычалмымат мондет. 

Саде уверем денак «Гугл» кум сайтым муо.

«Дак Дак Гоу» кычалше шке семынже вашештыш. Саде материалак, но тӱрлӧ сайтлаште. 

«Бинг» кычалше мыйын йодышемлан вашмут семын шке вариантшым ончыктыш. Интернет-кычалше-влак кудыжо шукырак, кудыжо шагалрак  уверым темлат. Садлан шке семынем нуным тошкалтыш радам гай верландарышым да кудыжым кучылташ сай - ойырен нальым.