21 март - Поэзийын тӱнямбал кечыже

Тодыштмо ломбо аршаш

Конешне, 

Тошкем гычын тодышт 

                                   кондымо 

Ош ломбо пеледыш аршаш,

Вара ӱстембалне мондымо,

Кунам-гынат йӱкым лукшаш.

Шижамыс, 

Айдеме йӱк дене

Мылам пуйто шортын ойла,

Кузе тудым тодышт коденыт,

Шона, пуйто толын война.

Анят шол, 

Оласе пачерыш 

Ош ломбо пеледыш аршаш

Конден тема мӱй таман 

                                       эрым,

Да самырык жап пӧртылшаш.

Эсогыл

Конда пӱртӱс ямым,

Конда да шула омо гай - 

Кода шижтарен шочмо ялым,

Кузе тушко толын от кай!

Тугеже, 

Жапаш пиал верчын

Шога мо йолвам тодышташ?

Пиал ила лачак ик кечым,

А сусыр кодеш ӱмыраш.      

Ок кӱл теле

Пуйто лийын огыл

Чатлама телат.

Олмапу шӧр шоҥым 

Мландышке вела.

Олмапу воктене

Ме вашлийына.

Тек огеш лий теле 

Шӱм пашаштына. 

Илалшылан

Ом пӧлекле тыланет висвисым,

Розамат ом шоно пӧлеклаш.

Ом шуйо пеледышым мый весым…

Кучыктем женьшеньым, шӱм йолташ.

Тиде кушкыл - илышын пеледыш:

Рвезе тӱсым чурийлан пуа.

Шулдыраҥме жап кеч модын эртыш,

Шинчашкет тул ойыпым пуа.

Тиде кушкыл - илышын пеледыш,

Йӧраташ шӱметым тулаҥда,

Шонымашым вуйышко, чалемшыш, 

Яндар деч яндарым пӧртылта.

Окоп

Чодыраште,

              Саласпилс воктене, 

Тымыкым мый таче ужынам:

Шӱшпык тудым лым лийде моктен да 

Мурым мурен тымыклан гына.

Ош сирень окопышто пеледын.

Парем шуо сусыржо ачан.

Ынде тымык вӱдыльӧ элемым,

Кече порсын…

                     Нале лупс шырча…

Сусыр утыждене ок витаре,

Кӱдырчан йӱр годым шижтара.

Эх, кунам ачай налеш гитарым

Да окоп нергенак муралта.

Шӱшпык йӱк гитарын ден варналте,

Кӱсле кылым йӱржӧ тӱкалта.

Ты окопыш вочшым дыр шарналын, 

Илыш сем кундемым авалта. 

Лышташ пӧрдем. 

Почеламут-влак. - Йошкар-Ола. Марий книга савыктыш, 

2008 ий.