Тек ончыкыжат вияҥ кушкеш

Йӧратыме газет - «Чолман»,

Кунам толат, мылам куан.

Шыман мый кидышкем налам,

Пеш шокшын вашлиям унам.

Вÿдшор жап годым шочынат,

Пÿртÿс пелен иланенат.

Виян пушеҥгыла кушкат,

Чевер саскат ден сылнештат.

Чолман вÿд гай тораш шуйнаш,

Эҥерла курымеш йогаш

Пеледын куш, нӧлталт каваш!

Тек ужышт тыйым йырым-ваш!

Тиде «Чолман» газетын 15 ияш лÿмгечыжлан пӧлеклен возымо почеламут. Чонеш логалше, кугешнаш таратыше, кумылым нӧлтышӧ мурсаска 20 ий ончыч, 2006-шо ийыште, газетын 43-шо номерыштыже савыкталтын. Почеламутын авторжо Анастасия Сайпашева тунам Мишкан район Тынбай школын 10-шо классыштыже тунемын, «Чолман» газетын тале юнкоржо лийын. А кызыт тудо Венгрийысе Печ университетыште пашам ышта. Венгр да китай студент-влаклан венгр йылмым да культурым, финноугристикым, марий культурым, фольклорым, финн-угор калыкын литературыжым туныкта (тудын нерген «Чолманын» 2025-ше ий 30 июльышто лекше 31-ше номерыштыже возымо).

Самырык авторын тыланымашыже шуын, манаш лиеш - «Чолман» газетна тачысе кече мартеат «виян пушеҥгыла кушкеш», «чевер саскаж ден сылнештеш» да 35 ияш лÿмгечыжым вашлияш ямдылалтеш.