Марий туныктышо «Юзо пасу» телепередачыште сеҥен

- Алена Геннадьевна, федеральный телеканалыш, «Юзо пасу» модышыш кузе логалында? 

- «Поле чудес» телепередачым мый шукертсек ончем, ик выпускшымат ом кодо манам гынат, йоҥылыш ом лий, шонем. Леонид Якубович деке студийыш изиэм годсек логалаш шоненам. Эше школышто тунеммем годымак кроссвордым ыштен ямдыленам. Кодший йодмашым колтенам, анкетысе йодышлан вашештенам да вучаш тӱҥалынам. Тугодым мияш ӱжыт манын, ӱшанымылат чучын огыл. Электрон почтыш Леонид Якубовичын кидпалыжым пыштыме официальный ӱжмаш толмеке веле кыртмен ямдылалташ тӱҥалынам. Икманаш, йоча годсо шонымашем шукталте.  

- Тушто лийме тат гыч тыланда мо эн чот келшен, поснак ушеш кодын?

- Телевиденийын кулис шеҥгелсе илышыжым палаш, «Юзо пасу» телепередачым «кӧргӧ гыч» кузе сниматлыме радамым шке шинча дене ужаш путырак оҥай ыле. Ончылно, шеҥгелне, эсогыл вуй ӱмбалне - студийыште камер пеш шуко. Съемка кок шагат утла шуйныш. Тиде мондаш лийдыме, ӱмыр мучкылан сай шарнымаш. Модшо-влак Севастополь, Краснодар да моло кундемла гыч миенна, икте-весе дене палыме лийынна. Чоным каласен моштыдымо куан кумыл авалтен! Тушто мом сниматленыт, чылажат эфирыш лектын огыл, конешне. А оҥай татше эшеат ятыр ыле… «Юзо пасу» - тиде вет модыш, тӱрлыжат лийын кертеш. Барабаным пӱтыраш черет шумеке, лекше йӧным кучылтын, чыла ыштен шукташ тыршыман - вет черет писын гына вес модшо дек куснен кертеш. Финалыште мый мутым, кок тӱрлӧ букваже веле почылтын ыле гынат, вигак каласышым. Жап эртымеке, передачым экраныште ончымеке, шкежат ӧрынам - кузе тыге лӱдде каласен кертынам? Шкалан ӱшаныде ок лий тыгай модмашыште.

- Профессий дене кӧ улыда, кушто пашам ыштеда? 

- Мый Краснохолмский селасе икымше школышто коло кокымшо ий англичан йылмым туныктем. Тиде школыштак тунемынам. Школ деч вара Бирск кугыжаныш педагогика институтын йот йылме факультетыштыже шинчымашым налынам. Паша коклаште тӱрлӧ мероприятийыште шуаралташ тыршем. 2013, 2021 ийлаште «Работница» районысо мастарлык конкурсышто кок ганажат кумшо верыш лектынам, 2023 ийыште «Идалыкын туныктышыжо» районысо профессиональный мастарлык конкурсышто «Самый творческий учитель» номинацийыште палемденыт. 

- Телепередачыште пелашда ден икшывыда-влакат койылалтышт. Ешда денат палдареда ала?

- Сергей пелашем дене коктынат Калтаса район Торасолан шочшыжо улына. Тыглай марий ешеш шочын-кушкынна. Кызыт Краснохолмский селаште илена. Пелашем «Роснефть» компанийыште нефтяниклан тырша. Дарья ӱдырна Нефтекамск оласе машиностроительный колледжын 1-ше курсшын студентше улеш, веб-дизайнер лияш ямдылалтеш, Полина ӱдырем Краснохолмский селасе 1-ше школын 4-ше классыштыже тунемеш.  

-Уло элнам марий калыкнан тӱвыраже, койыш-шоктышыжо дене палдарышда…

- Туге. Передачыш художественный номерым «намийышашемым» увертарымеке, могай мурым мурышашым, эсогыл могай тӱсан тувырым чийышашым, ончылгоч видеовыступлений, фото-влакым колтен, передачын музыкальный редакторжо дене каҥашаш логалын. Сценический образым нуно тӱткын ямдылат. Чаманен каласаш логалеш, школышто мылам марий йылмым тунемаш йӧн лийын огыл. Туге гынат ешыште эре шочмо йылме дене мутланенна. Авам-ачам, Ольга Байдимировна ден Геннадий Мингайдарович Минликаевмыт, икшывыштым - мыйым, Олеся акамым да Валерий шольымым - марий йылмылан шӱмаҥден моштеныт. Кызытат марла лывыргын мутланаш тыршем. Шочмо йылме дене мураш, лудаш йӧратем. Пелашем дене икшывына-влакымат тидлан кумылаҥден куштена. 

- Мутланаш жапым ойырымыланда кугу тау. Ончыкыжат у сеҥымашыш шуаш тыланена.