-3 °С
Пылан
Все новости
Саман увер
25 Пургыж , 14:21
Шочмо йылме мемнам пырля уша
Шочмо йылме дене йоҥгышо мутын чапшым кӱшнӧ кучымо, кушкын толшо тукымым калык-влакын тӱвырашт да йӱлашт деке шӱмаҥдыме, икте-весе деке пагалымашым пеҥгыдемдыме шонымаш дене кодшо арнян Пӱрӧ оласе икымше школ негызеш почеламутым сылнын лудшо-влакын конкурсышт эртыш. Тудым Российыште Калык-влакын икоян улмо, Башкортостаныште Татун илыше кугу еш идалыклан, тыгак Шочмо йылмын кечыжлан лӱмлымӧ ыле.
Авторын фотожо-влак.
Конкурсышто 14 образований организаций гыч 58 тунемше мастарлыкшым ончыктыш. Тудо ийгот шот дене кум тӱшкам да кум: башкир, татар да марий йылмым - ушен. Лудшо-влакын шуко улмыштлан кӧра конкурсым иканаште кум пӧлемыште эртарышт, жюри кум тӱшкалан шелалтын пашам ыштыш.
Йоча-влак ойын сылнылыкшым да чаткалыкшым, раш дикцийым да логический паузым, чын темп да интонаций дене лудмым, йӱкым кӱлеш семын «виктарен» да залын тӱткышыжым кучен моштымыштым ончыкташ тыршышт.
Мемнан Кужнур школ гыч конкурсыш Максим Кугубаев (1 класс, конкурс деч ӧрдыжтӧ выступатлыш), Алина Иликбаева (3 класс), Виталий Андреев (8 класс),
Татьяна Яныбина (9 класс) мийышт, почеламутым сылнын каласкалышт. Кажныже конкурсын сеҥымаш тошкалтышыштыже шке номинацийыштыже 2-шо верым айлыш. Рвезе-влакым тӱвыргӧ лектыш дене саламлена, нуным сайын ямдылыше туныктышо-влаклан кугу таум каласена. Тыгай вашлиймаш-влак шочмо йылмын тӱрлӧ улмыжым колаш, шочмо йылме дене йоҥгышо мутын мемнам пырля ушен моштымо вийжым шижаш полшат.
Новости партнеров