Чылажат Сеҥымаш верч!

Идалыкын тӱҥ задачыже нерген 

Тенийсе тӱҥ задачым кӱчыкын кум шомак дене каласен кертам - ЧЫЛАЖАТ СЕҤЫМАШ ВЕРЧ!

Тушман-влак нерген 

Мемнан тушманна - Украинын иза-шольо калыкше огыл. Тӱҥ тушманна - угыч ылыжаш тӱҥалше шучко неонацизм. Тудым ятыр ий годсек Российым еҥ кид дене лунчырташ, шеледаш да пытараш шонышо тӱшка Касвел намысдымын кушта. Тудо мыланна лишыл элым ваштарешна виктарыме тараныш, а украин калыкым нацист отморозок ден русофоб-влакын заложникышкышт савырен. 

Лидер нерген 

Мыйын шонымаште, пеш тале эмоциональный, информационный темдымаш, мемнан ваштареш шогышо икмыняр лу элын осал критикышт Владимир Путинын вачӱмбакыже гына вочшаш огыл. А тыге ынже лий манын, мом ыштыман? Туран каласыман: ме президентна дене пырля улына, Тӱҥ главнокомандующийын мемнан ончылно шындыме чыла задачыжым тӱрыс шуктена. 

Дроным ыштен лукмо нерген 

Мемнан предприятийна-влак Российыште эн ончыч FPV-дрон ден беспилотник-влаклан электродвигательым лукташ тӱҥалыныт. Инженер-влакын «Кыш Бабай» манын лӱмдымӧ неле дронышт тергымашым эртен да уже боецна-влаклан полышкала. Пытартыш кок ийыште СВО-ш 10 тӱжем утла дроным колтымо. 1 апрель гыч войскалаш 50 процентлан шукырак БПЛА-м колташ порученийым пуэм. 

Сарзе-влакын ешыштлан полшымо нерген 

СВО-н участникше-влаклан да нунын ешыштлан 55 тӱрлӧ полыш пуалтеш, тидлан бюджет гыч идалыкыште 30,5 млрд теҥге наре ойырымо. Правительствылан тиде пашам умбакыже шуяш, ты полышын пайдажым лончылаш да нуным вияҥдыме шотышто ой-каҥашым пуаш йодам. 

Бюджетым иземдымылан кӧра СВО участник-влакын родо-тукымыштын санаторийлаште льгот дене илаш йӧнышт кодын огыл. Тиде пунчалым келшыдымылан шотлем да республикын правительствыжым оксам муаш да тиде полышым тичмашнек пӧртылташ йодам. СВО гыч пӧртылшӧ кум тӱжем утла еҥ гыч 78 процент нарыжлан паша верым мумо. Муниципалитет вуйлатыше-влаклан ты пашам вияҥдаш темлем. Ик вереак комплексный консультацийым да практический полышым налын кертышт манын, СВО-н участникше-влаклан да нунын ешыштлан полшымо рӱдер-влакым почына. Идалык мучаш марте чыла район да олалаште тыгай рӱдерым ыштен шуктыман. 

Медицина реабилитаций нерген 

Мый медицина пашаеҥ-влакын ойышт дене кӧнем да Сар ветеран-влакын республикысе клинический госпитальыштлан врач-хирург, доброволец, медицина взводын командирже Михаил Каменевын лӱмжым пуаш темлем. 2023 ий шыжым сусыргышо-влакым эвакуироватлыме годым санитарный машинаштым беспилотник атаковатлымек, тудо профессиональный долгшым мучаш марте шуктен. Но… иктат илыше кодын огыл. 

Сар ветеран-влакын республикысе клинический госпитальышт - мемнан флагманна, ӱмаште медицина реабилитацийым организоватлыме пашаштым элыште эн сайлан шотленыт. СВО гыч пӧртылшӧ-влак кокла гыч 86 процентше диспансеризацийым эртен, но ме раш умылена: реабилитаций йӧным ешарыман. СВО участник-влаклан «Талкас» санаторийыште реабилитаций рӱдерым почман да СВО гыч пӧртылшӧ-влаклан, поснак сусыргышо да чот эмганыше-влаклан, физкультур да спорт дене заниматлаш йӧным ыштыман. Спорт министерство Рима Баталова лӱмеш Спорт рӱдерыште СВО-н ветеранже-влаклан занятий графикым пеҥгыдемдышаш, а муниципалитет-влак СВО-н участникше-влаклан тугок тренироватлалташ спорт объект-влакым ойырен налшаш улыт. 

Колышо салтак-влакын икшывышт нерген 

Колышо сарзе-влакын икшывышт - мемнанат йочана-влак. Меат уло республика дене нунылан йол ӱмбак шогалаш, пагалыме еҥ лияш полшышаш улына. Тиде йодышышто тӱҥжӧ - йӱштӧ шӱм-чонан лияш огыл. Ме тыгай койыш ваштареш кучедалаш тӱҥалына. 

Шарнымаш нерген

Республикысе калыкын СВО жапыште ыштыме воинский да паша подвигшым курымешлан шарнаш кодымо шотышто республика вуйлатышын указшым ямдылаш йодам. Тыгак специальный военный операцийын геройжо-влаклан лӱмлымӧ мемориал-влакым почмо йодышым рашемдыман. Ме Уфаште Спорт полат воктенсе площадьыште тыгай мемориалым ыштыме нерген пунчалым луктынна. Республикын правительствыжым финансирований йодышым рашемдаш да мемориал-влакым проектироватлыме пашам тӱҥалаш йодам. 

Военный да гражданский экономика нерген 

СВО-н задачыжым сайын решатлаш манын, экономикым пеҥгыдемдыман. Но тиде моло кӱлешан социальный задачым ӧрдыжкырак шӱкалмым огеш ончыкто. Мемнан вуйлатыме командынан иканаште специальный военный операцийланат пайдалын полшен шогымыжо, республикымат вияҥдымыже чын мастарлыкшым ончыкта. Специальный военный операций тыште, тылыште, кӱлешан йодышлам решатлаш чаракым ыштышаш огыл. Ме чыла социальный роскотлан оксам тӱрыс ситарена. 2022 ий годсек 50 утла кугу социальный объектым ыштенна, илыме верым чоҥымо темпым иземден огынал, кӱкшӧ пӧртан, парковый зонан у йӧнан микрорайон-влакым чоҥена. 600 наре общественный вер-шӧрым тӱзатенна. Автомобиль кудалыштме 100 утла километр корным ыштенна, 5 тӱжем километр нарыжым олмыктенна. У социальный объект-влакым пашаш колтена. 

У территорий-влаклан полшымо нерген 

Икымше кече гычак Российысе у регион-влакланат полшен шогена. Шке вийна дене ЛНР-ысе подшефный Красный Лучышто кум ий коклаште 5 миллиард теҥге нарылан 238 илыме, социальный да инфраструктурный объектым тӧрлатенна. Тений эше 157-ым тӧрлена. Ме элыштына, кӧлан неле, тудлан полшен илышаш улына. Иза-шольо Донбасс мландыште тыныс илыш тӱҥалмек, экономика да гуманитарный вашкылнам кумдаҥден колтена.

Тыныс илышым вучымо нерген 

Ме пӱрымашнам тергыме жапыште илена. 2026 ият куштылго огеш лий. Ӱшанем,  чыла ответственный задачым сайын решатлена, шуаралтына да эшеат виянрак лийына. Вашке гыч геройна-влакат мӧҥгышт таза-эсен да сеҥымаш дене пӧртылыт манын ӱшанем.

Кызыт кумдан палыме психолог, концлагерьын узникше Виктор Франклын мутшым ушештарынем. «Эн ончыч вашке гыч чыла тиде пыта манын шонышо-влак, нунын деч вара тиде иктаж гана пытышашлан ӱшаныдыме-влак «лыпшыргеныт». Ончыкыжо мо лиймым шоныде, шке пашаштлан гына тӱткышым ойырышо-влак илыше кодыныт», - манын тудо. 

Садлан мыланнат мужедаш, шонкалаш, кунам тиде пытышашым палаш тыршаш ок кӱл. Шкенан пашанам честно ыштыман, вашкылым пеҥгыдемдыман, икте-весылан ваш полшыман, мемнан ончылан шындыме задача-влакым шуктыман.

Мыят опорный регионым вуйлатыше семын, Башкортостан Россий дене пырля тиде неле жапым достойно илен лекше манын, уло вием пуэм, чыла опытемым да моштымашемым кучылтам. А тидлан, кузе Посланийыште ик гана веле огыл каласышым, ме тендан дене умбакыжат СЕҤЫМАШ ВЕРЧ ЧЫЛА ыштена!