Эн сай муниципалитет-влакым палемденыт

Федеральный методика почеш аклашлан пытартыш кум ийысе 11 показательым шотыш налыт: тиде калык чот ешаралтмаш, илыме верым чоҥымаш, посна тӱшкаш пурышо-влаклан илыме верым пуымаш, муниципальный казнасе парышын кугытшо, йочасадлаш черет, кружок ден спорт секцийлаш коштшо йоча-влакын чотышт, инвестицийын кугытшо, корнын качествыже, предприниматель-влакын чотышт да молат.

Тидын шотышто ола-влак коклаште эн сайлан Стерлитамакым шотленыт, административный рӱдеран район-влак коклаште 1-ше верыш Ишимбай, 2-шо верыш Дӧртыльӧ, райрӱдыжӧ села улмо район-влак коклаште 1-ше верыш Нуриман, 2-шо верыш Абзелил, 3-шо верыш Бурзян район лектыныт.

2019 ий годсек муниципалитет-влаклан тыгак 61 показательым ушышо республикысе аклымашым эртарат. Тудын дене келшышын, «Здоровье и демографическое развитие» номинацийыште ола-влак коклаште Уфа, рӱдыжӧ ола улмо муниципальный район-влак коклаште Давлекан, сельский район коклаште Караидель район ончыко лектыныт. «Социальное развитие» номинацийыште Кумертау, Бирск да Буздяк район ойыртемалтыныт.

«Устойчивое экономическое развитие» номинацийыште Салават, Мелеуз да Кармаскале районлам, «Безопасная и комфортная территория» номинацийыште Нефтекамск олам, Стерлитамак ден Бакале районлам, «Информационная открытость и обратная связь с жителями» номинацийыште Октябрьский олам, Белебей ден Татышле район-влакым палемденыт.