Нефтекамскыште БР Правительствын погынымашыже эртен

Нунын коклаште посна верым Нефтекамскысе машиностроительный завод айла. «НКМЗ-Групп» ООО нефть да газ отрасльыште кучылташ кӱлешан кӱкшӧ технологиян оборудований ден технологийым ямдыла. Андрей Назаров производственный участок ден скважинылан оборудованийым лукшо лабораторий-влакым ончен савырнен, компанийым вуйлатыше-влак дене тудым вияҥдыме нерген мутланен. БР Правительствын еҥже-влак тыгак пластик гыч чоҥымо арверым ямдылыше «АллМат» предприятийыште лийыныт. 

Тудо кечынак тыште Нефтекамск олан предпринимательже-влак дене вашлиймаш эртен. Андрей Назаровын палемдымыж почеш, верысе бизнес сомылым вияҥдымаште вич тӱжем наре субъект пашам шукта, нунын чотышт ешаралтеш. Предприниматель-влак утларакшым ужалыме пашаште, чоҥымо отрасльыште, производствышто, транспортышто, логистикыште тыршат. «Ола кугемеш, тудын дене пырля бизнесат кумдаҥеш. Мланде участкым налме гыч тӱҥалын, креативный индустрийлан полышым пуымо, куштылго промышленностьлан вияҥаш йӧным ыштыше программа гыч тӱҥалын, производственный площадка-влакым кугемдыме марте, тыгак кадр, самырык специалист-влаклан илыме вер шотышто аренда, креативный кластер-влакым ыштыме, промышленностьлан полышым пуымо да у проект-влакым тӱҥалаш условийым ямдылыме - икманаш, тӱрлӧ йодышым лончылышна. Ятыр порученийым пуым. Коллегем-влак дене ик жап гыч нунын деке уэш пӧртылына. Нефтекамск оласе бизнес йодеш веле огыл, тудо эше темла. Тиде поснак шерге», - каласен Премьер-министр.