Радий Хабиров «вияш линийыште» мом ойлен?

Дрон-влакын атакышт да интернетым йӧртымаш. Ме террористический атака-влаклан системный объектыш савырнаш тӱҥална, нунат чӱчкыдынрак лияш тӱҥальыч. Тиде чарна манын ойлаш нимогай амал уке. Ме нунылан ваштареш шоген моштена. Атака-влак лийыт гынат, чыла завод пашам ышта. Предприятий-влак дроным чарыше металлический сетка дене авыралтыныт. Оборона министерствылан кӧра мемнан радиолокационный эскерымашым шуктышо система, БПЛА-м пытарен кертше сай йӧн - «Панцирь», тыгак зенитный орудий, автоматический оружий, пулемет, автомат да гладкоствольный оружий уло. 

Кунам пилотдымо лӱдыкшы-дымылыкым увертарат, ме интернет, сото кыл деч посна кодына. Тидлан тунем шуаш кӱлеш. Умылыман: СВО - тиде ала-кушто тораште, кок километр ӧрдыжтӧ огыл, тиде эше тыште, да меат тиде событийын участникше-влак улына. Тыгай ситуацийыште ме нигӧм ойго дене шкетшым огына кодо, еҥ-влаклан лӱдыкшӧ лийме годым куштылго шонымашан ошкылым огына ыште. 

Кугыжаныш кучемыште - СВО-н участникше-влак. Мый декем администрацийыш СВО-што лийше еҥ-влак пашам ышташ толыт. Советник Оскар Ситдиков, общественно-политический проект-влак шотышто управленийын начальникше Ильмир Аглиуллин, эше кок еҥ документым оформитла. Йырем тыгай еҥ-влакым чумырем. Ончычсо еҥ-влак уда улыт манын ом ман, тиде конкурент шӱлышан тӱняште сеҥымашыш шуашлан кеч-могай ошкылышто эре мом-гынат уым ышташ кӱлмӧ нерген ойлем. 

«Герои Башкортостана» кадр программа - тиде мемнан историйна. Тудо специальный военный операцийым эртыше да тидлан кӧра ойыртемалтше койыш-шоктышан улшо-влакым кугыжаныш службыш пашаш налаш йӧным ышта, адакшым мемнан пашанат «служба» маналтеш. Мыланна решительный, ушан, патриот шӱлышан, шкеныштын элыштым йӧратыше, принципиальный еҥ-влак кӱлыт. Тыгай койыш-шоктыш сар гоч эртыше еҥ-влакын уло. 

Бюджетысе шийвундо. Мемнан тӱҥ задачына - специальный военный операцийлан полшаш. 

Обществыште тидым умылат. Тений СВО дене кылдалтше полышлан 26 миллиард теҥгем ойырышна - мыланна 32 миллиард теҥге кӱлеш. 2026 ий мемнан республикылан начар идалык лиеш, молан манаш гын ме тиде ийыш бюджетын эн кугу дефицитше дене пурена. Южо сомылна ӧрдыжыш шӱкалалтеш - тидыже раш, тидым умылыман. Но нимат огыл, Россий икана огыл тыгай кредалмаш-влак гыч лектын да вара сусыржым писын эмлен. Чыла сай лиеш. Катастрофа шотан прогнозым ышташ амалым огына уж. Мый еҥ-влакым лыпландараш тыршыше психоаналитик семын огыл тидым ойлем. Ме конкретный фактлан эҥертена. Мемнан республикысе чыла макроэкономический показатель сай кӱкшытыштӧ улеш, вияҥеш. Тиде мыланна йолымбалне пеҥгыдын шогаш да чыла социальный обязательствым шукташ йӧным пуа. 

Корным ачалымаш. Шупшыкташ лийме кугыт деч утларак нелытан грузым кондыштарыше транспорт мемнан корно-влаклан кугу эҥгекым конда. Республикыште нелылык шотышто контрольым шуктышо 11 станций пашам ышта. Йодмашым пудыртымашлан штрафын кугытшо 400 теҥгеш шуэш. Нине станций-влак деч ме республикын бюджетышкыже миллиард теҥге марте оксам чумырена. Тиде окса корно фондыш кая. Корнылаште шуко камерым вераҥдымылан мемнам чӱчкыдын шылталат. Ме тидым тушто шот лийже манын ыштышна. Корнылаште ӱмыр лугыч лийше-влак шотышто мемнан республика эре йошкар зонышто лийын. Кызыт тиде ситуацийым мыняр-гынат тӧрлатышна, но правилым пудыртымаш шуко. Штраф-влакат (тиде кум миллиард теҥге утла наре) корно фондыш каят, да ме нуным корным саемдаш кучылтына. Мемнан еҥ-влакым штраф дене орландараш шонымашна уке. Корнылаште сайын коштса, да штраф ок лий.    

Колледж-влак. Ме колледж-влакым арален кодена, вет нуно мемнан промышленный, ял озанлык предприятий-влакнан, экономикынан тӱҥ партнержо улыт. Мемнан сетьна кугу - 92 колледж. Нуно чылан тӱрлӧ состоянийыште улыт. Кушто дыр совет жапысе ПТУ-м ушештарыше, шучко состоянийыште улшо колледж-влак кодыныт, а южыжо кыдалаш профессиональный образованийын флагманже лийыныт. Но икмыняр олаште ме колледж-влакым ик кугу тунемме комплексыш ушена. Тиде вийым иктыш чумыраш полша, административный роскотым шагалемда: ик директор, ик бухгалтерий да молат. 

Фейк нерген. Фейк - тиде илышнан ужашыже, да тидын дене мыланна илаш логалеш. Тиде каен шогышо кугу информационный сарын ужашыже. Тиде сарыште сайын кредалман. Мыланнат кредалаш кӱлеш, тидлан ваштареш шогаш тунемман. Таче сар - тиде чогашыл кредалмаш огыл, тиде уш-акылын сарже.   

Наставник-влак. Илышыште тугай еҥ-влак лийыныт, кудыжым мый колыштынам да кудыжын шонымашыже мылам шерге лийын. Тиде врач Виль Мамилович Тимербулатов, писатель Михаил Андреевич Чванов, эше Мустай Карим дене кыл эре шокшо лийын. А тыге… Эре шкендын пашам ыштыме сферым утларак ончет. Мылам Сергей Семенович Собянинын пашам ыштымыжым палаш оҥай.