«МЧС России» ден «112» приложений-влак молан кӱлыт

«МЧС России» приложений. Тиде сервисым кугыеҥ да йоча-влаклан пайдаланаш ыштыме. Тудо айдемым лӱдыкшӧ ситуацийлаште шкем чын кучаш туныкта: мутлан, кузе вӱд воктене каныман, кузе шкем да лишыл еҥым пожар деч аралыман, кузе чодыраште йомман огыл да молат. Мобильный приложенийыш лӱдыкшӧ пӱртӱс явлений, заводла гыч уда юж лекме, тазалыклан але илышлан лӱдыкшӧ чер, БПЛА чоҥештылме нерген экстренный сообщений-влак толыт. 

Приложенийым RuStore, App Store онлайн-кевытлаште тугок скачатлаш лиеш, тудо IOS ден Android операционный системылаште пашам сай ышта. Вес семынже, тудым нимогай нелылык деч посна айфонышкат, андроидышкат вераҥдаш лиеш. Установкым ыштыме годым приложений кушто улмым ончыктымо верым автоматический йӧн дене муаш разрешенийым йодеш. Тыге тудын дене пайдаланыше еҥын вер гыч верыш кусныл кайымыж годымат кӱлешан увер телефонышкыжо писын гына пурен кертеш. Сервис айдемын могай селан, олан мландыштыже улмым рашемда да тунамак тиде жаплан мо деч шекланаш кӱлмӧ шотышто шижтарымашым колта. Настройкышто те ешартыш регион-влаклан подпискым ыштен кертыда. Тиде, мутлан, авадан-ачадан илыме олаште мо каен шогымым пален шогаш да лӱдыкшӧ нерген нунылан жапыштыже увертараш йӧным ышта. 

Южысо тревога, чодыраште йомынат, лифтыште «пижынат», гаражыште пожар - приложенийыште илышыште лийын кертме тӱрлӧ случайлан памятка-влак улыт. «Икымше полыш» пӧлкаште туткарыш логалше айдемын илышыжым утарен кодаш полшышо каҥашым чумырымо: тупрӱдым эмгатышылан, аяргыме годым, кишке чӱҥгалме, чогашыл шупшмо (судорога) годым кузе лийман да илышлан лӱдыкшӧ моло ситуаций годымат. «Турист тӱшка» пӧлкаште походлан ямдылалтме, снаряженийым ойырымо, маршрутым палемдыме шотышто инструкцийым муаш лиеш. А эше тыште, спасатель-влак кушто улмыдам палышт да кӱлеш годым писын гына утарыме операцийым шуктен кертышт манын, турист тӱшкам регистрироватлаш лиеш. 

«112 - Экстренная помощь» приложений. Приложений экстренный ситуацийыште илышым утарен коден кертеш. Тудлан кӧра те спасатель-влакым писын ӱжыктен, тыгак спасений службын операторжо дене чатыш ушнен кертыда. 

«112» приложений полшымо дене туткар нерген увертараш да медик, пожарный, полиций да моло экстренный оперативный служба пашаеҥ-влакым парня дене ик гана тӱкалтен ӱжыкташ лиеш, - ойла БР Чрезвычайный ситуаций шотышто кугыжаныш комитетын председательже Кирилл Первов. Те тыгак шкендан нерген чыла данныйым ончылгоч пуртен кертыда, а йомыда гын, службын диспетчерже геопозицийдам ужеш. Тыгай увер вызовыш писын да рашын тарванаш йӧным ышта. Спасатель-влак туткар лийме сӱрет дене кумданрак палыме лийын кертышт манын, мобильный приложений гоч фотом да видеом колташ лиеш. Тыгак приложенийыште шкендан нерген данныйым: вӱр тӱшкам, аллергийым, хронический чер, кочмо эм-влакым палемдаш лиеш. Тиде илалше еҥ-влаклан поснак кӱлешан.    

«МЧС России» семынак, «112» приложенийым RuStore, App Store сервислаште тугок скачатлаш лиеш, айфонышкат, андроидышкат вераҥдаш йӧнан. «112 - Экстренная помощь» мобильный приложений дене республикыште вич тӱжем еҥ, «МЧС России» приложений дене 10 тӱжем еҥ пайдалана. «Кунам ме сообщенийым колтена, тиде сото кыллан экшыкым ышта, садлан еҥ-влак тудым вараш налыт, - ойла регион вуйлатыше Радий Хабиров. - Айдеме приложений дене пайдалана гын, тудо сообщенийым тыманмеш налеш да кӱлеш решенийым приниматлен кертеш. Тиде пеш кӱлешан йодыш. Ме тидым еҥ-влак деке шуктышаш улына. Кум гана темдалмеке, система пашам ышта. Тыге нуно тыманмеш пӱтынь оповещений системын участникше лийыт».