Кавун - поян шыжын озаже

Кавуным шолташ, жаритлаш, тушитлаш лиеш. Тыгак тушеч запеканкым, джемым, сокым, ӱйым ямдылат. Тыгай пакчасаскам пареш ямдылаш, запеканкым ышташ, изи тулеш кӱкташ сайрак - тыге тудо пайдажым арален кода. Кавунын тамжым тӱрлӧ специй утларак «почаш» полша. Десертлан ваниль, кардамон, бадьян да корица келшен толыт. Шинчал дене ямдылыме кочкышлан «прованский» манме шудо, чеснок, орегано, розмарин да чабрецым кучылташ сай. Кавун ямдылыме кочкышышто кешыр, олма, шоган, нӧргӧ пареҥге да ужар шоган, укроп дене сай «йолташ» улеш, тудым тыгак кайык, вольык шыл гыч ямдылыме кочкышыш ешараш йӧнан. Шӱмжым куштылгынрак эрыкташлан кавуным, пелыгыч пӱчкын, тушыж деч эрыктен, ик-кок минутлан микроволновкыш вераҥдаш лиеш. 

Сыр да кавун шӱр

Кӱлеш: 500 г кавун, 200 г сыр, 1 вуй шоган, 3 пӱй чеснок, 4 кугу совла кушкыл ӱй, вӱд, шинчал ден пурыс, ужар шоган але укроп. 

Кавуным эрыктыман да 2 см кугытан кубик семын, шоган ден чеснокым тыгыдын пӱчкедыман. Кастрюлеш ӱйым ырыктыман да шоганым шӧртньӧ тӱсан лиймеш жаритлыман. Тушко чеснокым ешарыман да эше 1-2 минут тулышто кучыман. Кастрюльыш кавуным пыштыман, пудыратыман да кокла тулеш эше 5-7 минут жаритлыман. 2-3 сантиметрлан кӱшкырак лиймеш изишак вӱдым пыштыман. Шолаш пурымеке, тулым иземдыман да кавун пушкыдеммешке, 20-25 минут наре, кӱктыман. шӱрым блендер дене лугыман. Тушко тыгыде теркеш нӱжымӧ сырым ешарыман. Сӧрастарашлан ужар шоганым, укропым кучылташ лиеш.