-27 °С
Пылан
Все новости
Саман увер
29 Сентябрьыште , 16:47
Аллейым ломбо ден гортензий сӧрастараш тӱҥалыт
«Ужар Башкирий» акцийым эртарымаш республикыште поро йӱлаш савырнен. Тудым кундемыште 2019 ий годсек идалыклан кок гана - шошым да шыжым - эртарат. 27 сентябрьыште Башкортостанын районлаштыже, олалаштыже калык пушеҥгым шындыме суапле сомылыш ушнен. Нефтекамскыште тыгай акций годым ий еда тӱрлӧ аллейым тӱзландарат, нуным кажныжым ойыртемалтше лӱмышт палдара.
Авторын фотожо-влак.
Шуматкечын Ленин урем тӱҥалтыште Паша чап аллейын ик могырыштыжо «Шуберт» сорт 100 виргинский ломбо пушеҥгым, вес могырыштыжо 300 вондер гортензий пеледышым шындышт. Тиде аллейыште кызыт «Нефтекамск: ось времени» проект почеш тӱзатыме пашам шуктат (Проект олалаште илаш йӧнан вер-шӧрым ыштыме шотышто Всероссийский конкурсышто сеҥышыш лектын.) Илыме вер-шӧрым сӧрастарыме сомылыш оласе тӱрлӧ организацийын пашаеҥышт, предприниматель, студент, школлаште тунемше, СВО-н ветеранже, депутат, волонтер-влак ушненыт. Уло ешге, изи икшыве-влак дене пушеҥгым шындаш мийыше-влакат лийыныт. Тӱшка паша тӱвыргын вораныже манын, чыла йӧным ыштеныт - паша ӱзгарым, перчатке, фартук-влакым ончылгоч ямдыленыт, филармонийын пашаеҥже-влак, пашалан кумылаҥден, мурышт дене кумылым нӧлтеныт. Нефтекамск олан мэрже Эльдар Валидов, БР просвещений министрын алмаштышыже Инесса Косолапова, БР Кугыжаныш Собраний - Курултайын депутатше Рустем Ахмадинуров Нефтекамск кажне ийын тӱзлана манын палемденыт да калыклан илыме вер-шӧрын моторлыкшым аралаш тыланеныт.
Новости партнеров