Могай книгам лудыда?

Лудаш йӧратыше-влакым олаште книгам ужалыме кевытыштат чӱчкыдын ужаш лиеш. Кугурак тукым, школышто тунемше-влакат мият. Книгалан библиотекыш коштшыжым яллаште, олалаште тачысе кечын парня дене шотлаш лиеш, очыни. А эше улыт улмаш тугай-влакат, кудыжо, ялысе библиотекыште улшо сай книгам лудын пытарымеке, книгалан райрӱдысӧ библиотекыш кудалыт. 

Электрон книгам лудшо-влакат вашлиялтыт. «Тыге пешат йӧнан», - ойлат. Туге, библиотекыш, кевытыш кайыман огыл. Планшетым, телефоным поч да луд. Интернет тӱняште пургедын, кумыл йодмо тӱрлӧ произведенийым кычал муаш лиеш. Но кагазеш савыктыме книгам лудмашым электрон гаджет вашталтен кертеш мо? Лудшына-влак могай книгам лудаш утларак кумылан улыт: савыктымым але электрон книгам? 

В. ХАФИЗОВА (Бирск ола): Мылам савыктыме книгам лудаш келша. Тудо мылам лишылрак. Книгам лаштыклаш, книган пушыжым шижаш йӧратем. Пытартыш жапыште шуэн лудам: яра жап уке гаяк. Но лудаш тӱҥалам гын, чарнен ом керт. Мучаш марте шуде, кидем гыч ом нал. Могай книга логалеш - чыла лудам, жанр шотышто ом ойыркале. Пытартыш гана военный книгам лудынам. Авторжо А. Куликов, «Когда закипает кровь» маналтеш. Келшыш.

В. КИСМАТУЛЛИНА (Янаул ола): Мый печатныйымат, электрон книгамат лудаш йӧратем. Печатный вариант уке гын, электрон книгам кычалам. Эн чот историй темылан романым лудаш келша. Тидлан, очыни, колледжыште тунеммем годым «Война и мир» роман кумылаҥден. Жанржат келша. Пытартыш гана «Юная жена» ӱдырамаш романым лудынам. Авторжо - Майя Бэнкс.

Н. КАЙНИЕВА (Нефтекамск ола): Кеч-могай книгам лудаш ямде улам. Ончыч савыктыме книгам гына лудам ыле, ынде онлайн лудаш йӧн лектын. Но нунын ик ситыдымашышт уло - кызыт гына «кӱктен» лукмо у книган икмыняр страницыжым гына тугок лудаш лиеш, умбакыже оксам тӱлаш йодыт. Пытартыш жапыште руш классик-влакын произведенийышым угыч лудам. А. Чеховын, М. Зощенкон ойлымашыштым, Л. Толстойын «Детство» повестьшым лудым. «Ончыко» журналымат шергалам. Сылнымутан литературым лудаш йӧратем. Кеч тиде марий, руш классический, кеч Российыште илыше моло калыкын сылнымутан произведенийже лийже - сайын возымо гын, чылажат лишыл улыт. Г. Зайниевын книгаже кидышкем логалеш гын, лудде ом чыте.

Л. ИСЛАМГУЛОВА (Эльян села, Краснокам район): Мый классик-влакын произведенийыштым, тыгак психологий дене кылдалтше, историй шӱлышан книга-влакым йӧратем. Тӱҥ шотышто электрон книгам лудам, молан манаш гын нуно эре кид йымалне, телефонышто, улыт. Южгунам савыктыме книгамат лаштыклем. Нуныжо шергырак улыт, конешне. Тыгайжым интернет-кевытлаште муаш лиеш. Тиде кечылаште, мутлан, марий калык йӱла нерген книгам лудым. Айдемын вес тӱняш кайымекыже, молан «кумытшым», «шымытшым», «нылле» кечыжым, «идалыкшым» эртарыме нерген пален нальым. 

Т. МИКАЕВА (Агидель ола): Савыктыме книгам йӧратем, конешне. Но кызытеш жап шыгыррак, садлан кастене малаш вочмо деч ончыч южгунам интернетысе книга-влакым лудам. Пытартыш гана Дарья Донцован детективше-влакым лудынам ыле. Кызыт теве Элеонора Гильмын книгаже-влакым налын пыштенам. Тольык кунам нуным лудаш тӱҥалам? Тидыже йодыш… Марла книга-влакым: М. Шкетанын, В. Ивановын, В. Абукаев-Эмгакын да молын роман ден повестьышт-влакым - пешат йӧратем, нуным эше ик гана лудын лекташ кумылем уло. Оласе библиотекыште муын кертам гын… Чаманен каласаш логалеш, лудаш пагытым муаш нелырак.  

Л. ГИМАЕВА (Нефтекамск ола): Мый печатлыме книгам лудам: мылам книгам кидыш кучен, тудым шижын, герой-влакын эмоцийыштым шӱм-чон гоч колтен лудаш келша. Электрон книган содержанийжым мылам умылаш молан дыр нелырак. Пытартыш жапыште психологий шӱлышан литературым - С. Лазаревын, Д. Кехо, Р. Блектын произведенийышт-влакым - лудам.   

Икманаш, еҥ-влак печатлыме, савыктыме книгамат лудыт - кӧлан кузе келша. Тӱҥжӧ икте - лудаш йӧратыше еҥ садак лудеш, тидлан кеч-могай йӧным муэш: кеч телефонышто электрон книгам, кеч кидеш кучен лудмо савыктыме книгам.