Уста кидан тÿрлызӧ, ургызо

Мишкан район У Тынбай ÿдыр, Изимар шешке Ирина Владимировна Ярмингина (ÿдыр фамилийже Апаева) калык вургемнам арален кодышаш верч кугу пашам шукта. Тудын мастар кидше дене мыняр марий тувыр, ончылсакыш, шовыр, пешмет ургалтын - шотлен пытараш огеш лий. Тÿрлен да урген ямдылыме тувыржо дене ятыр ÿдырым (шкенжын кокыт) марлан пуэн. Отыш кумалаш мийыше-влакланат йодмо почеш, шкеж денак кудыртен, ош марий тувырым да ончылсакышым урга. Илыш ончыко кайыме семын марий вургемынат ургышыжо вашталт толеш. И. Ярмингина илыш дене тӧр ошкылеш, заказым пуышо еҥын йодмыжым эре шукташ тырша. Икшывыже, уныкаже-влакымат марий тувыр дене куандара. Йодмо почеш тÿрлеман, порсын тасман, шкенжым кудыртыман, «корак шинчан», кружеван тувыр-влакым урга. Марий орнаментан кружевам кучылтын, пӧръеҥ-влаклан, Виталий пелашыжлан, Вадим эргыжлан ик тувырым веле огыл урген.

Ирина Владимировна ургаш изинек кумылаҥын - Анна аваже туныктен. «Авам шкаланже вургемым эре шке урген, а мый воктенже пӧрдынам. Пÿчкеден ямдылыме тасма гыч лу ияшем годым авамлан икымше марий тувырым ургенам. Тÿрлашат пеш келшен. Иктаж мотор узорым тÿрлем да пырдыжыш пижыктен шындем ыле. Унала пурышо пошкудо-влак эре мокталтен ойленыт, тыге кумылем нӧлтеныт. Тынбай школышто 8-ше класс марте тунемынам. Труд урокыштат кидпашалан сайын туныктеныт. Бирск оласе ГПТУ-што трикотажный курсышто тунемынам. Марлан лекмем годым чиктышаш тувырымат шкеак ургенам», -  шарналтен ойла уста кидмастар.

И.В. Ярмингинан кидше гыч кужу жап «Подольский» ургымо машина каен огыл. Кызыт Китай гыч кондымо ургымо машинам кучылтеш. Тувыр ден ончылсакышлаште тÿрлымӧ узорышт-влак чонан пеледышла койыт. «Кажне ургызын, тÿрлызын шке кидше», - ойлат калыкыште. Ирина Владимировнан тÿрлымыжым да ургымыжым вес еҥын дене пулаштараш огеш лий - тудын шке кидше, шке мастарлыкше. Теве тыгай уста кидмастар-влак улыт коклаштына. Нуно шукырак лийыт гын, марий вургемнат аралалт кодеш манын, ÿшан ок йом.