+14 °С
Облачно
Саман увер
5 Сентября 2025, 10:44
Школ автобусшат, водительжат йодмашлан келшен толшаш улыт
Краснокам районышто кугыжаныш автоинспекцийын пашаеҥже-влак образований пӧлкан еҥже-влак дене пырля школ автобус-влаклан техосмотрым эртареныт. Йоча-влакым кондыштарыше автобусым шагатлан 60 деч утларак километрым (60 км/час) каяш чарыше устройство да спецсигнал-влак дене йӧнештарат. Техосмотрым эртарыме годым автобусын технический ойыртемжылан, тӱжвалсе волгалтарыше прибор, тормоз да руль системын, лӱдыкшыдымылык ӱштӧ, топливым кондыштарыше системын пучшо, автобус гыч лекме вер-влакын тӱз улмыштлан, РФ-ын корныласе правилже шотышто документаций, палдарыше знак, аварийный сигнализаций, медицина аптечка, огнетушитель, ГЛОНАСС система, тахограф улмылан поснак кугу тӱткышым ойырат.
Авторын колтымо фото-влак.
Водитель декат йодмаш-влак улыт. «Д» категориян водительский удостоверений деч посна, тудын тыгак 21 ийым темыдыме пассажир-влакым шупшыкташлан водитель стажше кум ий деч шагал огыл лийшаш, ик ий корныласе правилым пудыртымо серьезный экшык лийман огыл. Эн тӱҥжӧ - тудо паша ден каныме режим деке йодмашым шуктышаш, тыгак вуеш шудымо икшыве-влакым кондыштарыме правил нерген инструктажым эртышаш.
Образований учреждений-влакын вуйлатышышт, школ автобусым кондыштарыше водитель-влак дене инструктажым эртыме. Кугыжаныш автоинспекцийын пашаеҥже-влак тыгак кажне водитель дене пассажирым кондыштарыме шотышто ответственность, корныласе правилым шуктымо, пассажир-влакын нунылан илышыштым ӱшаныме нерген мутланымашым эртареныт.
