Молан тӱрлӧ йӱр йӱреш?

Кӱдырчан йӱр

Дӱр-дӱр-дӱр кӱдырта.

Шыде, шучко,

Но вашке лӱшкен эрта.

Лыжга йӱржӧ

Лыж-лыж-лыж тӱҥалеш.

Лыжгыкта вел,

Кечыгутак опталеш.

А молан йӱреш тыге,

А молан лиеш тыге - 

Йочалан пачкаталан

Умылтарыше уке.

Ачажат шол, агроном,

Кечыгут пасушто.

Пеш ушан да поро, но

Кычал от му тушто!

Лыжга йӱрыш логалеш -

Йоча гай нӧрен пыта.

«Кинде йӱр!

              Пеш сай!» - манеш,

Шыргыжал гына колта.

Мӱндыр кӱдырчым колеш - 

Кугу ман, садак лӱдеш:

«Ынже тол ыле шолем,

Шурным ынже кай шолен!»

А вавайже мом пала?

Иктым тӱя огыла:

«Шоҥго дечын мом йодат?

Тунемат - пален налат».

Вот садлан изи йоча 

Шкак умылтараш тӧча:

- Эй, кузе тый, кувавай,

Тидымат от пале, кай!

Лыжга йӱржӧ вичкыжрак,

Вичкыжрак да шуэрак.

Вот садлан, так тӱҥалеш,

Кум кечат оптен кертеш.

Кӱдырчанже, кӱдырчанже

Шолдырарак да талырак.

Вот садлан кугу пырчанже

Велын кая вашкерак.

А вара шыман гына

Куваваже дек пызна,

Мутшо дене шоҥгын чоныш

Ӱйым пыштенак пышта:

- Кӱдырчыжӧ, кувавай,

Чылтак тыйын шыде гай:

Кӱдыртылеш - лӱдыкта,

Лӱдыктылеш - кӱдырта,

Но тугак вашке эрта,

Чевер кечым пӧртылта.

Шыргыжале шольыкай

Йӱр деч вара кече гай!

(Колумб В. Ойырен чумырымо ойпого. Почеламут-влак. I том. - Йошкар-Ола. Валентин Колумб лӱмеш музей-рӱдер, 2005.)