MAX нерген мом палаш кӱлеш

Мутланаш веле огыл. Еҥын проблемыжымат решатлен мошта

Кызытеш приложенийын чыла базовый функцийже уло: текстан да йӱкан сообщенийым возаш, групповой чат-влакым ышташ, стикер, «эмоций», 4 Гб марте файл-влакым колтылаш, интернетын сигналже уда годымат йыҥгырташ, тыгак кужу жап шуйнышо да ятыр еҥ ушныман тӱшка видеозвонокымат ышташ лиеш. 

Max - икте-весе дене кылым кучымо тӱрыснек шкенан элын у мессенджерже веле огыл, тиде тыгак шуко тӱрлӧ задачым ик верыште решатлен, кызытсе жапын йодмашыжлан вашештен кертше кугу платформа. Лишыл жапыште мессенджерым изи огыл вашталтыш вуча. Профильым «Госуслуги» сервис деке «пижыктен», приложений гыч лекдеак, тӱрлӧ сомылым шукташ: пелашлан оксам колташ, «коммуналкым» тӱлаш, врач деке возалташ, кафеште пиццым заказатлаш, таксим ӱжыкташ, шкендан каналым почаш да палыме блогерыш савырнаш - лиеш. 

Max-ыште канал-влак улыт, но кызытеш нуно тестированийым эртат - тушко икмыняр кугу федеральный СМИ, блогер да губернатор-влак гына пурен кертыт. Коклаштышт Радий Хабироват уло. Тудын каналжын адресше - max.ru/radiyhabirov. Икымше кечынак каналжылан вич тӱжем утла еҥ подпискым ыштен. Подписчик-влакын чотышт писын ешаралтеш. Кузе мыланна увертареныт, пользователь-влаклан шке каналыштым почаш тиде шыжым йӧным ыштат. Мемнан изданият шке каналжым почеш. 

Max данный-влакым шолышт кертеш мо? 

Пытартыш кечылаште интернет тӱняште икгайрак шонымашан ятыр статьям савыктеныт: пуйто Max «мемнам тӱткын эскера, телефон гыч чыла уверым кушко-дыр колтылеш, эсогыл пуйто камерымат шкеак чӱкта да йӱдым мемнам возгала».  

Чынжым гын, Max-ын «шпион» приложений улмыжо нерген манеш-манешым нимогай факт-влак огыт пеҥгыдемде, тиде чыла эмоций дене кылдалтын. Чыла разрешенийым Мax моло мессенджер семынак йодеш. Камер да микрофон дек доступ йыҥгырташ да йӱкан сообщений-влакым колтылашлан, контакт деке - йолташ-влакым кычалашлан, файл деке - документ-влакым колташлан, геолокаций деке - кушто верланымым палемдашлан, Bluetooth деке - тендан моло устройствыда дене, наушник да смарт-шагат дене, кылым ышташлан кӱлеш. 

Пайдале функцийже-влак улыт

Приложенийым шергалмеке, ме йӧнан да пайдале икмыняр функцийым муна:

«Лӱдыкшыдымӧ режим» - тиде эн ондак илалше-влаклан йӧнан. Кӱчыкын каласаш гын, «Приватность» манме пӧлкаште настройка уло, кудыжо «шкендан-влак» (те да мутланыме еҥда икте-весын телефон книгаште улыда) дене веле йыҥгыртен мутланаш йӧным ышта. Палыдыме номер-влак тыланда йыҥгыртен огыт керт. 

Вашешташ мондаш огыл манын, сообщений-влакым «лудылтын огыл» манын палемдаш лиеш.

GigaChat тугок нейросетьше уло. Тудо, йӱкан сообщений-влаклан писын гына расшифровкым ыштен, сӱрет-влакым генерироватлен, йодышлан вашештен, текст-влакым возен да моло сомылым шуктен кертеш.

ТӰТКӦ ЛИЙЗА. Max-ым мошенник-влакат шымлат

Мошенник-влак эре еҥ шуко улмо верыш мият, садлан нуно у мессенджерымат шымлаш тӱҥалыныт. Кызытеш тыгай случайже шагал. Мутлан, МВД-ште каласкалыме почеш, Уфа олаште илыше 26 ияш ӱдыр тудлан «рӱдӧ банк пашаеҥ-влакын» йыҥгыртымышт да тудын Госуслугысо аккаунтшым пудыртымо нерген каласкалымышт деч вара «лӱдыкшыдымӧ счетыш» 300 тӱжем теҥгем кусарен. 

2025 ий июльышто Max мошенник-влакын 10 тӱжем утла номерыштым блокироватлен, молыжо-влак дене кучедалашлан «тревожная кнопка» манме функцийым илышыш шыҥдарен. Тудын дене пайдаланашлан лӱдыкшӧ сообщенийым темдалмеке, меню почылтеш. Тушто «пожаловаться» манмым ойырыман да амалжым умылтарыман. 

Те шкежат «цифровой гигиена» нерген ида мондо: кӱлешлык деч посна палыдыме номер-влаклан ида вашеште, телефон дене окса нерген ойлат гын, трубкам пыштыза. Шарныза: нимогай «лӱдыкшыдымӧ счет» уке да преступлений нерген шижтарашлан полиций, следственный комитет, ФСБ да рӱдӧ банк гыч огыт йыҥгырте.  

ПАЛАШ УТО ОГЫЛ. Кузе скачатлаш да регистрацийым эрташ?

1. Max-ым RuStore, Google Play, AppGallery, App Store платформылаште скачатлаш лиеш. Windows ден macOS-лан сайт гыч веб-версийым шындаш лиеш. Приложенийым скачатлыза да «Пураш» манмым темдалза. 2025 ий сентябрь гыч Российыште ужалыме чыла смартфонышто тиде мессенджерым вераҥдыме лиеш - шукерте огыл тыгай закон вийым налын. 
2. Регистрацийлан Российысе але Белоруссийысе телефон номер кӱлеш. Тудым возыза да «Продолжить» манмым темдалза. Тыланда подтверждений семын куд знакан код толеш. Тудым приложенийыш пуртыза да «Продолжить» манын темдалза. 
3. Моло пользовательлан ужаш лийме лӱмым возыза. Руш але латин буква дене возаш, пробел ден дефис-влакым шындаш лиеш. Цифрым, эмодзим да ойыртемалтше символ-влакым кучылташ ок лий. Кумыл уло гын, фамилийым ешараш лиеш. «Продолжить» манмым темдалза. 
4. Шкендан аватаркыдам грузитлыза але ямде шаблон гыч ойырыза. Аватаркым кеч-кунам вашталташ лиеш. Тиде ошкылым кодаш да фотом настройкышто вараракат ешараш лиеш. 
5. «Начать общение» манмым темдалын, регистрацийым мучашлыза. 
6. Max-ыш иканаште икмыняр устройство - мутлан, сото телефон, мӧҥгысӧ да пашасе компьютер гыч - пураш лиеш. Чат ден йыҥгыр-влак коклаште синхронизаций лиеш.