«Марий улмына дене кугешнен илыман»

Индивидуальный предприниматель семын тиде сомылым 2021-ше ий гыч шукташ тÿҥалыныт. Тывел могыр районлаште нунын нерген шукынжо палат, очыни. Тиде ешын бизнес-планже пеш кугу да кумда: Йошкар-Ола, Казань, Соль-Илецк, Айские притёсы, Тургояк, Сонькина лагуна, Пошкырт кундемысе тÿрлӧ заповедный вер-влакым ужын кошташ, каныш жапым пайдалын эртараш йӧн уло. Мÿндыр Дагестанышкат коштын савырнаш лиеш. Тиде кундемыш июнь, июль тылзыште кок гана ужын да канен толыныт. Нунын шарнымашышт пеш поро да кумылым нӧлтышӧ. Богдан эргыштат ачаж дене пашаш ушнен, водитель-экспедитор семын тырша.  Нуно калык дене ик ойыш вашке шуын моштат да сайын каналташ чыла йӧным ышташ тыршат. Экскурсийыш мийыше-влаклан шукыж годым самовар ден чайым, шокшо пловым темлат. Вадим Байназов калык дене кылым вашке муын мошта да рульым веле огыл сайын виктара, тудо эше уста гармонист улеш. Ямле марий семже дене тÿрлӧ калык гыч улшо чыла еҥымат тывырдыкым кушталташ тарватен кертеш. Кеч-могай кундемыш каят гынат, Марий Эл але Казань, але эше вес вере - пеленже эре тальянке. Кӧ экскурсийыште лийын, группысо комментарийлаште Байназовмыт ешлан поро деч поро мутым гына ойлат да сайын каналташ йӧным ыштымыштлан уло кумылын тауштат. 

Предприниматель пашам Вадим Александрович 2000 ийыштак тÿҥалын, «Алёна» ООО-н вуйлатышыже лийын. Тиде пашам 2021 ий марте шуктен.  А кызыт тудын пашажым Нелли пелашыже шуя, Чорай селасе «Алёна» магазиным вуйлата. 

Нелли Николаевна ден Вадим Александрович коктынат Мишкан район Пӧкленде ялын шочшыжо улыт. Шочмо ялысе тÿҥалтыш, Чорай кыдалаш школлаште тунемыныт. Вадим Байназов Бирск пединститутышто биологий да физкультур факультетыште шинчымашым поген (ече спортышто Башкирийын чемпионжо марте кушкын). Нелли Алпаева (ÿдыр фамилийже) Бирск оласе кооперативный техникумышто, вара Российысе коопераций университетын Башкир кооперативный институтыштыжо экономика дене кылдалтше факультетыште паша деч кӱрылтде тунемын. Келшен да икте-весым пагален, йӧратен илыше ешыште кум икшыве кушкеш. 

Тиде еш марий шÿлышан, марий койышан улеш. Калыкнан йÿлажым, марий пайрем-влакым пагалымаш шижалтеш. Мишкан да Бирск районлаште мыняр сÿаныште сÿанвате ден сÿанмарий лийын, у ешым чумыраш полшеныт - чотшат уке, очыни. Вадим Александрович уста кидше дене моторын шокталтен колта гын, Нелли Николаевна мураш мастар. Яра жапше годым Н. Байназова «Эрвий» ансамбльыш коштеш. В. Байназов марий тальянист-влакым чумырымо ансамбль дене тÿрлӧ пайремын, фестивальын унаже улеш.  Июнь тылзыште Санкт-Петербургышто илыше марий калыкымат куандарен толыныт. Ямле семышт дене тÿрлӧ пайремым сӧрастараш полшат. Байназовмыт еш денат тÿрлӧ фестиваль, конкурслаш ушнат. 2022 ийыште финн-угор кышкарыште эртарыме «Самоцветы Прикамья» фестивальыште нуным «Мыйын творческий ешем» конкурсышто диплом дене палемденыт. Икманаш, тиде еш талантан да усталык шÿлышан улеш. Тыршен шуктымо бизнес пашашт кажнылан куаным конда. Марий койышышт дене калыкнан чапшым кÿшкӧ нӧлташ полшат. Тыгай чолга да тату еш дене кугешнаш веле кодеш! 

- «Чолман» газетым лудшо-влаклан могай тыланымашда лиеш? - йодым Нелли Николаевна деч.

- Марий улмына дене кугешнен илыман. Марий газетым лудман. Йылмынам, йÿланам, марий койышнам мондыман огыл. Кузе кована-кочана, авана-ачана мыланна шыҥдареныт, тидым меат рвезе тукымлан пуэн да туныктен кодышаш улына. Марий йÿлана, пайрем радамна-влак тукым гыч тукымыш куснат гын, калыкнан ончыкылыкшо кугу лиеш. Йылмынат аралалт кодеш, калыкнат илаш тӱҥалеш.