Законысо вашталтыш нерген

Кугыжаныш пошлиным кугемдат

Россий Президент Владимир Путин тений 1 сентябрь гыч водитель-влаклан кугыжаныш пошлиным кугемдыме нерген законеш кидпалыжым пыштен. Документ дене келшышын, 2025 ий сентябрь гыч транспортым кондыштарашлан правам налме годым тӱлымӧ пошлинын кугытшо кызытсе 2-3 тӱжем гыч 4-6 тӱжем теҥге марте вашталтеш. Автомобильым регистрироватлаш да кугыжаныш номерым налаш 2 тӱжем олмеш 3 тӱжем теҥгем тӱлыман лиеш. Транспортлан паспортым ышташ кызытсе 800 теҥге олмеш 1,2 тӱжем теҥгем, тӱнямбал водительский правам налаш 1,6 тӱжем теҥге олмеш 3,2 тӱжем теҥгем тӱлыман, увертара «Российский газетын» сайтше.

Ава-ача дене каҥашыде ок лий

Вуеш шудымо икшыве-влаклан банкыште счетым тидлан нунын аваштын-ачаштын келшыме улмыштым рашемдымеке веле почаш тӱҥалыт. Икшыве-влак чӱчкыдын мошенник-влакын ондалчык вапшышкышт логалыт: нуныжо шолыштмо оксаштым йоча-влакын банк картышт гоч наличный оксаш савырат. Ава-ача-влакын текшырымышт лӱдыкшӧ ситуаций деч кораҥаш полша.

Историйым аралыше верым локтылман огыл

Шочмо элым, тудын интересшым аралыме верч вуйыштым пыштыше сарзе-влакым шарныме лӱмеш чоҥымо объектым, тыгак воинский захоронений-влакым мыскылымылан уголовный мут кучаш шогалтат (Российыштат, йот эллаште верланыше мемориал-влакланат тыгак). Эн кугу наказаний шотеш 5 ий марте эрык деч посна коден кертыт. 

СВО-н салтакше-влаклан

Специальный военный операцийыште порысым шуктышо военнослужащий-влаклан ЕГЭ-м сдатлыме результат дене шукырак жап пайдаланаш йӧным ыштеныт. Тыгай жапым нунылан лӱмын шуеныт. Тиде СВО-што лийше-влаклан образованийым налашышт йӧным ешара, тыгак служба деч вара адаптацийым писынрак эрташ полша.

Башкортостаныштат июль мучаште южо законыш вашталтышым пуртеныт. 

У профессиональный кече да у званий

Башкирийыште у профессиональный кечым да у почетный званийым пуымо нерген пунчалым пеҥгыдемденыт. Ынде 27 июльышто ий еда кугыжаныш да муниципальный услугым пуышо шуко функциян рӱдер (МФЦ) пашаеҥын кечыжым палемдаш тӱҥалыт. Тыгак ойыртемалтше пашаеҥ-влаклан «Заслуженный работник МФЦ РБ» чап званийым пуат.

Опекун ден попечительлан

1 июнь гыч Башкирийыште тулык икшыве, тыгак ава-ачаштын полышышт деч посна кодшо йоча-влакым ончышо опекун ден попечитель-влаклан тӱлымӧ оксам 16,6 процентлан ешареныт. 3 ийым темыдыме икшывым ончышо опекун ден попечитель-влаклан тылзылан ынде 10 855 теҥгем, 3 ий деч кугурак ийготан йочам ончымылан 10 439 теҥгем тӱлаш палемденыт, 3 ийыш шудымо инвалид йочам але экшыкан тазалыкан икшывым куштымылан тылзылан тӱлымӧ окса 13 027 теҥгеш, 3 ий деч кугурак ийготаным ончымылан тӱлымӧ окса тылзылан 12 526 теҥгеш шуын.

Единовременный оксам тӱлымӧ жапым шуеныт

31 августышто Башкортостан Вуйлык Радий Хабиров «О дополнительных мерах социальной поддержки отдельных категорий лиц, проходящих военную службу» указыш вашталтышым пуртен. Документ дене келшышын, республикыште илыше да специальный военный операцийыш ушнымо нерген контрактым ыштыше-влаклан единовременный оксам тӱлымӧ жапым эше ик тылзылан - 2025 ий 31 август марте - шуеныт. Контрактник-влаклан тӱлымӧ единовременный окса полышын кугытшо кызыт 1 700 000 теҥгеш шуэш. Тушеч 1 300 000 теҥгеже - республикын шийвундыжо, молыжо федеральный окса.

Ешышт нерген огыт мондо 

Башкирийыште военнослужащий-влакын ава-ачаштым алмаштыше-влаклан материальный полышым пуат. Тидым «О дополнительной мере социальной поддержки членов семей погибших (умерших) военнослужащих, лиц, проходивших службу в войсках национальной гвардии РФ» законысо вашталтышыште рашемдыме. Документ Российын мландышкыже керылт пурышо-влакым чактарыме, тыгак элын кугыжаныш чекыштыже, Украина деке лишне улшо мландыште вооруженный провокаций годым илыш дене чеверласыше военнослужащий-влакын ешыштлан 2 миллион теҥгем тӱлаш йӧным ышта, увертара «Башинформ».