+14 °С
Облачно
Саман увер
2 Августа 2025, 08:41
Вишня когыльо
Комжылан 300 г ложаш, 1 муно, 80 г ӱмбал, 150 г ушкал ӱй, 80 г сакыр, 1 изи совла разрыхлитель, когыльо кӧргылан 450 г тувыртыш, 170 г вишня, 1 муно, 100 г сакыр, 100 г шоколад, 0,25 г ваниль экстракт, чывыштыш шинчал кӱлыт.
Вишня когыльо
Шӱштыра (песочный) руашым ямдылаш ӱмбал ден муным, пырля лугалтен, ынже ыре манын, холодильникыш шындыман. Келге атеш шоктмо ложашыш сакырым, шинчалым, разрыхлительым ешарен пудыратыман. Тушкак морозильник гыч лукмо ӱйым терко гоч нӱжыман (ложашым шавалташ гын, куштылгынрак нӱжалтеш). Ӱй падыраш-влак ӱмбак ложашым шавалтен шогаш гын, огыт леве. Вара ты атыш муно дене лугымо ӱмбалым опталман да пеш вашке гына нӧштылман. Артык ложашым ешараш да кужаш нӧштылаш тыршыман огыл - руаш утыжым пеҥгыдемеш.
Ямде руашым кок ужашлан пӧлыман да, пленка дене вӱдылын, когыльо комлан шараш ямдылыме кугурак ужашыжым 20 минутлан холодильникыш, когыльо ӱмбак нӱжышаш изирак ужашыжым морозильникыш пыштыман.
Тувыртышым вилке дене сайын лаштыртыман, шинчалым шавалтыман да муным, сакырым ешарыман. Тувыртыш кочакрак гын, шукырак, уке гын, шагалрак сакыр кӱлеш.
Холодильник гыч руашым луктын, формылан келшыше 0,7-1 см кӱжгытанрак мелнам ыштыман да пергаментан салмаш вераҥдыман. Тувыртышыш вишня ден шоколадым ешарен, ком ӱмбак шарыман, а ӱмбакше морозильник гыч лукмо руашым нӱжыман.
Когыльым 190 градус марте ончылгоч ырыктыме духовкеш 50 минут наре кӱктыман да формешак йӱкшыктыман, вара гына пӱчкедыман.
