Тӱткӧ лийза!

Эше ондалаш шонышо-влакат эреак у йӧным шонен муыт: я пуйто почто гыч йыҥгыртат да толшо посылкым оформитлаш телефоныш колтымо кодым каласаш йодыт, я пуйто следователь йыҥгырта лиеш, я маркетплейс-влакын заказым пуымо пунктышт гыч сатум мӧҥгыда намиен кодаш темлат да тыгодым персональный данныйым йодыт… Тыгай шоя йӧнжӧ тич погына, чылажым радамленат шукташ огеш лий. А оптышыш логалаш огыл манын, шкаланнак тӱткырак лияш тыршыман. 

Россий МВД-н пашаеҥже-влакын палемдымышт почеш, киберпространствыште моткоч кӱлешан правил уло - тендан нерген мыняр шагалрак палат, тунар тендам ондалаш нелырак. А йоҥылыш каласен колтымо шомак мошенник-влаклан «ондалчык мундыраштым» умбакыжат рончаш йӧным ыштен кертеш.   

Мо еҥ кидыш логалшаш огыл?

Финанс информаций

Картын номерже, могай сроклан пуымо, СVC/CVV-код, интернет-банкын логин ден парольжо, SMS дене толшо код, пеҥгыдемдыше push-увертарымаш.

Персональный документ

Паспорт данный, ИНН, СНИЛС, документысе фото-влак.

Аутентификационный код 

SMS дене ик гана колтымо кеч-могай пароль, push-код, пеҥгыдемдыме QR-код. 

Приватный информаций

Родо-шочшо-влакын адресышт, телефон номерышт, кушко кайымышт, кызыт кушто улмышт. Поснак - виш аккаунтлаште.

Данный-влакын комбинацийышт

Лӱм+шочмо кече+телефон номер - парольым пален налаш, электрон почтыш пураш але кредитым оформитлаш тидым палымат сита.

Тидымат шарныман: банк, «Госуслуги», полиций паспортым але кодым НИГУНАМ телефон дене але чатыште ОГЫТ ЙОД.