+15 °С
Дождь
Саман увер
26 Июня 2025, 09:59
«Бригантина» лагерьыште корныласе правилым ушештареныт
Кеҥежым корнылаште йоча травматизм дене кылдалтше йодыш поснак пӱсӧ улеш. Шукерте огыл Нефтекамск оласе да Краснокам районысо кугыжаныш автоинспекцийын пашаеҥже-влак «Бригантина» тазартыме лагерьыште корныласе правилым шуктымо шотышто мероприятийым эртарышт. Йоча-влаклан машина кудалме корно воктене шкем кузе кучаш кӱлмӧ нерген умыландарышт, тушто чӱчкыдын лийше тукар-влак нерген каласкалышт.
Авторын колтымо фото-влак.
Коныласе лӱдыкшыдымылык шотышто Нефтекамск олан инспекторжо Л. Хабибуллина ӱдыр-рвезе-влаклан корным йолын вончымо верлаште, светофор улмо перекресткышто шкем кучымо правил-влак нерген ойлыш. Корныласе правил-влакым эскерыме шотышто Краснокам районын инспекторжо С. Исакова пычкемыш жапыште вургемыште волгалтарыше элементым кучылташ, тудым кушко пижыктыме нерген мутланымашым эртарыш, йоча-влакым автомобильыште кондыштарыме годым тидлан лӱмын йӧнештарыме креслым да моло устройствым кучылташ кӱлмӧ нерген каласкалыш. Вашлиймаште инспектор-влак тыгак корнылаште велосипед дене кудалыштме правил-влакым, авто-мототранспортым права деч посна виктараш чарыме нерген ойлышт, йоча-влакын йодышыштлан вашештышт.
Мошенник деч аралалтме йодышат ӧрдыжеш кодын огыл. Телефонышкышт палыдыме номер гыч смс толеш гын, тидын нерген вигак ава-ачалан, а нуныштлан правоохранительный органыш увертараш кӱлмӧ нерген ушештарышт.
