Лудмаш айдемын уш-акылжым пойдара

Пайремыш тӱрлӧ кундем гыч уна-влак толыныт, Москва гыч лӱмлӧ творческий еҥ-влак шуко пайдале мероприятийым, вашлиймашым, мастер-классым эртареныт. Нунын коклаште кумдан палыме писатель-публицист Олег Рой, телевиденийын вӱдышыжӧ Оксана Федорова, СВО-што лийше поэт, музыкант Сергей Нихаенко,  Донбасс гыч поэт Анна Ревякина да молат лийыныт. 

Тений Уфасе книга пайремыш элысе 21 кундем гыч 100 утла издательство да эше Иран, Беларусь, Казахстан да Кыргызстан гычат книга-влакым конденыт. Марий-влакат ӧрдыжеш кодын огытыл. Мемнан республикысе шочмо йылмынам йӧратыше, лудаш кумылан-влаклан Йошкар-Ола гыч толшо творческий йолташна-влак пайрем сыныш марий тӱсым ешареныт да тудым пайдалын пойдареныт. Марий книга савыктыш пашаеҥ-влак шке пашашт, книга да савыктен лукмо моло сатушт дене палдареныт. Кугу форумым почмо годым Башкортостанын Вуйлыкшо Радий Хабировлан, республикыште тыгай книга пайремым эртарымылан да шокшын вашлиймылан тауштен, Марий книга савыктыш деч Андрей Эшпай, Мустафа (Йыван Кырла) нерген лукмо, «100 марий поэт» книга-влакым пӧлекленыт.

Кызыт, газет да журнал-влаклан возалтме жапыште, «Поро подписка» акцийым тарватыме. Книга ярмиҥгаштат тыгай суапле пашам шыҥдареныт. Радий Хабиров шкежат, тыгак Москва гыч толшо уна-влакат икмыняр еҥлан подпискым ыштыме квитанцийым пӧлекленыт. А Марий книга савыктышын директоржо, Марий Элысе Кугыжаныш Погынын депутатше Эдуард Иманаев марий-влаклан суапле пӧлекым ыштыш: шушаш пелийыште «Чолман» газетым Уфасе Рушарня школышто налаш тӱҥалыт, эше икмыняр марийлан, мер да тӱвыра илышыште чолга койышан улмыштлан, тыгаяк поро подпискым ыштыш. А «Ош Виче сем» ансамбльын еҥже-влак, Эдуард Аркадьевичын кидше куштылго лийже манын, чыланат «Чолманлан» возалтына манын ӱшандарышт.

Газетлан возалтме жап мучашке лишемеш, кок арня утларак веле кодеш. Поро кумылан чолга марий-влак ончычат лийыныт, кызытат икте-весыштлан, пошкудыштлан, родо-шочшыштлан «Чолманым» подписка семын пӧлеклат. Тугеже, «Поро подпискым», поро койышым огына мондо, умбакыжат шуена. Тӧра, предприниматель але моло марий-влак, южыда шочмо йылмым тунемын огыл, марла лудын-кутырен огыда мошто гынат, вес еҥлан поро пашам ыштен кертыда. Тенийсе идалыкын вес пелыжлан «Чолманлан» возалтме ак - 609 теҥгеат 60 ыр веле, а газетын индексше - П2752. Республика Вуйлык, Марий Эл гыч толшо  йолташна-влак ончылно намысыш пурышаш огынал дыр? Мӧҥгешла, «Ме эше сайрак кертына!» манын, ты пашам шуйышаш улына манын шонем. Газетнан электрон почтыжо, ВК, ОК соцсетьлаште шке лаштыкше-влак улыт, иктаж-мом рашемдышаш уло гын, «Поро подписка» нерген уверым, йодыш-влакым тушкат колтен кертыда.