+18 °С
Дождь
Саман увер
15 Мая 2025, 05:48
«Шӧртньӧ кид» мастерской
Идалык ончыч Кӧкыш тӱвыра пӧрт пелен «Шӧртньӧ кид» мастерской почылтын. Тиде Межпоселенческий тӱвыра да каныме рӱдер ден калык дене пашам ыштыше «Вера» рӱдерын проектше. Мастерскойым Президент грант-влак фонд полышым ончыктымылан кӧра почмо. Грант окса дене куымо станок-влакым, тӱрлымӧ машинам, мебельым, шӱртым да моло материалым налыныт. 2024 ий 1 февраль гыч тудым илышыш шыҥдараш тӱҥалыныт.
«Шӧртньӧ кид» мастерскойын кидмастарже-влак. Авторын да Кӧкыш СДК-ан соцлаштыкше гыч налме фото-влак.
«Тыгай мастерскойым шукертак почаш шоненна, - ойла клубын художественный вуйлатышыже Олеся Кугубаева. - Тыгай ой дене мый районысо тӱвыра пӧлка вуйлатыше Григорий Владимирович Лисков деке мийышым. Куратор Снежана Геннадьевна Кутлубаева дене мутланышна. Тудо грант-влакым ойырымо конкурсыш ушнаш темлыш. Икымше гана ме конкурсым ышна эрте. Чылажымат уэш тӱҥалаш кӱлын: проектым возаш, расчёт-влакым ышташ, йодмашым пуаш. Кокымшо гана конкурсышто сеҥышна да пашанам тӱҥална. Эн ончычак куымо станок дене кузе пашам ыштымым шымлен лекна. Станокым мыланна Киров ола гыч конденыт. Тӱҥалме годым лӱдмашанрак ыле, миен огеш лек манын шоненна. Шинча лӱдеш гынат, кид ышта. Тыге эркын паласым куаш тӱҥална».
Кажне тыланыше еҥ, тышке толын, паласым куаш тунем кертеш. Кызыт мастерской изарня еда пашам ышта.
Тыште мастар ӱдырамаш-влак паласым гына огыт куо, тыгак тӱрлат, ургат да пидыт. Нунын пашаштым районысо краеведений музейыште ужаш лиеш.
