+14 °С
Облачно
Саман увер
13 Мая 2025, 11:09
Яндар поянлык
Изи Соказа ял вӱдлан пеш поян. Тиде поянлык дене палдараш да тудым аклен мошташ туныкташлан таче 5 классыште тунемше-влак дене ял йырысе памаш-влакым ончен савырнышна. Ял воктечынак Соказа эҥер йоген эрта, тушко ятыр памаш йоген пура, шукыжын лӱмжым ынде огынат пале. Мемнан ял велне гына куд памаш: Таран, Арама, Шоптыр, Курык йымал, Морко. Шоптыр памашыжын пураже шӱйын волен, садлан аҥжым муаш йӧсӧ, ночко вер гай веле койын шинча. А вӱдшӧ тушто пушкыдо ыле. Ялыште вӱдпучым шупшмек, памаш-влакым мондаш тӱҥална, нуным огына ончо.
Авторын фотожо-влак.
Морко курык йымач да тиде верыште пеш шуко памаш шолын лектеш. Вӱдын могай кугу виян улмыжым таче йоча-влак дене шке шинчана дене ужна. А тиде памашет-влак пуйто айдемын толмым вученыт: изишак удыралат веле - йымачын изи кӱ шамычым нӧлтен, уло вийын шолаш тӱҥалыт. Те тыгай вийым ужында мо?
Ожно Морко курыкышто руш ял лийын, ынде тиде верыште лач олмапу да сирень гына айдемын илыме вержым шарныкта. А памаш деке ондак, кӱтӱм кӱтымӧ годым, эре вӱдлан коштына ыле. Тӱрлӧ шудым пыштен, тамле чайым шолтенна. Айдеме тышке кажне кечын коштын, эрыктен. Тыгай поянлыкым йомдарыман огыл.
