+14 °С
Облачно
Саман увер
7 Мая 2025, 06:45
Ялнам сӧрастарена
Изи Соказа ялыште кажне каныш кечын паша шолеш. Ял калык шке кудывечыжым гына огыл, ялымат сӧрастараш тырша. Кок арня почела субботникым эртарышна. А Яков Степанович Лукьянчиков ден Алена Витальевна Чижонок яллан сылне арт-объектым пӧлеклышт.
Авторын колтымо фото-влак.
Ялчына-влак, куанен, тудым ялыш пурымаште вераҥдышт, пеш мотор да сӧрал миен лекте. Пӧръеҥ-влак сваркым да бетоным ыштыме пашам шуктен шогышт, а ӱдырамаш-влак посадкыште пушеҥгым ошемдышт, тӱрлӧ пеледышым шындышт.
Алена Витальевна Изи Соказа ялеш шочын, Казахстаныште кушкын, но вара ешыже уэш ялыш илаш пӧртылын. Бирск оласе медицинский училищыште шинчымашым погымек, 12 ий военный контракт почеш фельдшер лийын служитлен. Но тидын нерген мутланаш пеш огеш йӧрате. Тудлан военный конфликт-влак кайыме «шокшо точкылаштат» лияш пернен. Кызыт ешыж дене Бирск олаште ила, косметическо-массажный салоным кучат. Пелашыже, Яков Степанович, тӱрлӧ янлыкым да моло арверым ышташ мастар. Нунын кудывечыштышт маска, чевер лыве, моло янлык ден кайыкат улыт. Алена Витальевна шке шочмо ялжым огеш мондо, а пелашыже тудлан пеҥгыде эҥертыш улеш. Нуно олаште илат гынат, яллан эре полшен шогат.
А ме, ял калык, нунылан пеш кугу таум ойлена. Пеҥгыде тазалыкым, пиалан кужу ӱмырым тыланена. Умбакыжат шонымыда шукталт шогыжо.
