Ужын кошташ йӧн уло

- Мый тиде тур дене каяш черет шумым ик идалык вучышым, - манеш Владимир Бикъянович. - Тений 8 гыч 15 апрель марте Минскым да моло оҥай верлам ужын толаш пиал шыргыжале. Мемнан группыштына 42 еҥ ыле. Уфа гыч Минск марте кок шагатат пеле самолет дене чоҥештыман. Аэропорт гыч туроператор-влак сайын ужатышт, Минскыште мемнам Степан лӱман экскурсовод порын вашлие, автобус дене «Вояж» отельыш наҥгайыш. Илыме верна келшыш, пӧлемыште кок еҥ дене илышна.

Турын программыжым моштен чоҥеныт. Сеҥымаш кечылан Беларусь чот ямдылалтеш. Сар годым тушто немыч-влак кажне кумшо еҥым пуштеденыт. Садлан сар тема дене кылдалтше шуко экскурсийым пуртеныт. Кугу Ачамланде сар музейым ончен савырнаш ик кечат ок сите. Хатынь мемориал комплексым ужашат намийышт. Беларусь мландыште 1942 гыч 1944 ий марте каратель-влак концлагерьлаштат шуко еҥым пытареныт. Тыгай лагерьлаште колышо-влакым шарнен, «Тростенец» мемориал комплексым почмо. Тушко мияш да чыла шке шинча дене ужын кошташ лӱмынак ик кечым ойырышт. Чынак, гидын ойлымыжым колыштын, чон коршта, шинчавӱдат лектеш.   

Мыланна шуко исторический верым ончыктышт: Минскыште автобус денат, йолынат ятыр коштна. Минск - пеш мотор да ару ола. Художественный музейым ончен савырнашат ик кече кӱлеш. Несвиж олам, Мирский замокым ужаш - кугу пиал. 

Шуматкече яра кече ыле, тӱрлӧ ужалыме верлаш кошташ жапым пуышт. А ме тиде кечын шкенан тӱшкана дене Гродно олаш экскурсийыш мийышна. Туштат шуко оҥайым пален нална. Гродно - чынже денак музей-ола. Органный концертым колыштмаш гына мом шога!

Минск деч мӱндырнӧ огыл Дудутки музей-ял уло. Тушто ожсо мардежвакшым ончыктышт, белорус-влакын тӱрлӧ ремеслошт дене палыме лийна. Апшаткудышто имне таганым тапташат йӧн уло, уна пӧртыштӧ тусо пареҥге ден сӧсна коям тамлен ончаш лиеш да молат.

«Ший» ийготан пенсионер-влаклан «Башкирско-белорусское долголетие. Туризм» программа оҥай вер-влакым льготный ак дене ужын кошташ йӧным ышта. Тыглай туристлан ик арнялан 48400 теҥгем тӱлаш кӱлеш гын, ме 34400 теҥгем тӱлышна. Беларусьышто Россий гыч мийыше турист-влакым шкеныштын лишыл родышт семын вашлийыт. Мыланна пелен Россий паспортым гына налаш кӱлын, магазинлаште «Мир» банк карт дене тӱлаш лиеш, чыла вере рушла мутланат. Нимогай чаракат уке, кумылет уло гын, миен ужын толаш лиеш. 

Мыланем тушто чылажат келшыш, коштын толмемлан пырчат ом ӧкынӧ. Ӱшаныме шуэш, тиде проект дене пайдаланен, эше шуко пенсионер тӱрлӧ вере миен, оҥай верлам ужын кертеш.