1 май - Шошо да Паша пайрем. Кумылым нӧлта, куаным конда

Мишкан район Тынбай ял калыкат ӧрдыжеш кодын огыл. 19 апрельыште тунемше, туныктышо-влак да техперсонал субботникыш лектыныт. Школ йырысе кугу территорийым эрыктен, ÿштын, поген шынденыт. Тиде кечынак тӱвыра аланыште тыршыше пашаеҥ-влак учреждений йыр эрыктеныт. Нуно тиде пашам икмыняр кече шуктеныт. Тидын годымак ялысе икмыняр активист йоча площадкым шÿк да кукшо шудо деч эрыктен.

24 апрельыште ялым сӧрастарыме икмыняр поро паша шукталтын. 2017 ийыште ППМИ почеш налын вераҥдыме йоча инвентарь ачалыме сомылым йодын да печыжымат тӧрлаш кÿлын. Тÿшка пашаш 19 еҥ ушнен. Верысе сельский поселенийын администрацийже чиям да сеткым пуэн, шкештат пашаш ушненыт. 

9 майыште Сеҥымашлан 80 ий темме кечым палемдаш ямдылалтына. Памятник воктене чиялтыме да моло тӧрлымӧ паша шукталтын. СДК-ште тыршыше техперсонал да библиотекарь кугу пашам намиеныт. 

Тиде кечынак тошто остановкым профнастил дене петырыме. Кечывал деч вара куд пӧръеҥ тиде пашам шуктеныт. «Айык села» районысо конкурсышто ялна 3-шо верым сеҥен налын да 20 000 теҥге окса дене палемдалтын. Ялысе илыш нерген ямдылыме видеолан сельский поселенийын секретарьже Г.В. Абдулина вуйын шоген.  Ял калык дене каҥашымеке, тиде окса дене оҥа гыч ыштыме остановкым тӧрлаш кутырен келшыме. 

Тÿшка пашаш ушнышо да ял илышым сӧрастараш полшышо-влакын лÿмыштымат ончыктымо шуэш. Тиде Д. Янгубаев, М. Шамратов, В. Ямакаев, В. Шамыкаев, С.  Аймурзин, В. Ибутаева, З. Баязова, И. Шаймарданова, Л. Зотов, В. Абдулин, Г. Абдулина, Н. Минаева, Л. Яныбеков, В. Ибашев, С. Шамиев, Н. Николаева, Р. Иманбаева, И. Шайбаков, Д. Яметов. Ял илыш верч ойгыртен, тÿшка пашаш ушнен шогышо тыгай еҥ-влак лийыт гын, ял ончыкыжат илаш да пеледалташ тÿҥалеш. Ыштен шуктымо пашан лектышыжым ужын, чон куана, кумыл нӧлтеш.