24 апрель - «Чолманын» шочмо кечыже. Тисте семын ужшаш улына

Мыланем пагытыштыже общественный распространительын сомылжымат шукташ логалын. Усолаште, кушто мый илем, ик оҥай еҥ ила ыле. Минлихан Байбахтин - фермыште вольыкым ончышо, шочмо суртыштыжо сай мӱкшызӧ, ялыште молла семын пеш кӱлешан мер пашам шуктен, тудым эре мелнам чоклаш ӱжыныт. Уремыште вашлийме годым пелештен, кеч-кунамат кумылым нӧлтен кертын. Ик ий шошо пеш эр тольо. Вашлиймыж годым ойла: «Теве, Юмо уке манат, кум кече коклаште мыняр лум шулен». Ойлымо еҥем газет-журналымат лудаш ок ӧркане ыле. «Могай газет ден журналлан возалтат?» йодмылан вашештен: «Пуйто от пале. «Марий коммуна», «Ончыко», «Пачемыш». Тыге марла лудаш йӧратыше-влак марий кундем гыч толшо газет ден журнал-влакым вученыт. 

Калтаса ден Мишкан велыште шке районысо газетыштым марла лудшо-влаклан изиш кӧраналтынат. «Чолман» республикысе марла газетын ош тӱняш толмыжо сандалыкыште у шӱдыр шочмо гай лие. Кунам мыланем тиде газетын корреспондентше лияш темлышт, мый торешланаш шым тӱҥал, кӧнышым. 

Тумарте нигунам марла возен омыл, улыжат «Марий коммуныш» кум статьям колтенам ыле. Но возымо практика погынен, Шаран районысо «Знамя Октября» газетыш коло ий утла ялкор семын серенам. 

Жап эрта, газетна ий гыч ийыш вашталт толеш, ийготымат пога. Ме южгунам кузе тудо элын йӧсын илыме пагытыште шочмыжым огынат шоналте. Тау республикын вуйлыкшо-влаклан шке калыкыштым тӧр ужмыштлан. Мемнан «Чолман» газетна уло, мемнан деч вич пачаш шагал удмурт-влакынат газетышт уло. А мыняр марий пошкудо Урал, Пермь велне, Удмуртийыште, Татарстаныште, Киров кундемыште шочмо йылмышт дене лудын кертде илат. Южгунам газетна нерген поро шомакым пелешташат тептерна ок сите. А вет ме газетым ончыко ӱжшӧ тисте семын ужшаш улына.