«Шаранские просторы» газетлан - 90 ий

Ты ийлаште тӱрлӧ йыжыҥым эртен, ятыр корреспондентым куштен, тӱҥ редактор-влакат алмашталтыныт, но икте вашталтде кодын - тудо тачат районышто илыше калыкын йӧратыме газетше.

Газетын 90 ияш юбилей пайремышкыже район вуйлатыше, редакций пашаеҥ, паша ветеран, журналист, ялкор да газетын йолташыже-влак шукын погынышт. Юбилей дене саламлаш Ринат Шайбаков («Башкортостан Республика» Издательский пӧрт), Ильшат Зарипов (БР-ын Журналист ушемже), Лира Гафарова («Благоварские вести» газетын тӱҥ редакторжо, Журналист-влакын йӱдвел-касвел усталык ушемыштым вуйлатыше) толыныт ыле. Газетын эн сай сотрудникше ден ветеранже-влакым Чап грамот да таумутан серыш-влак дене палемдышт.

Таче редакцийыште 10 еҥ пашам ышта. Тӱҥ редакторлан Миляуша Хамадеева тырша. Газетым 12 страница дене арнялан ик гана рушла да татарла савыктат. 

«Шаранские просторы» газет Шаран район дене иктаҥаш улеш. Неле сар пагытыштат, сар деч варасе пуламыр жапыштат савыкталтмым чарнен огыл, лудшылан эре пайдале лийын. Ончыч «Сталинчы», «За ленинский путь», «Знамя Октября», а 2002 ий гыч «Шаранские просторы» лӱм дене лектеш. Таче газет образований, медицина, культура, ял озанлык, Кугу Ачамланде сар, СВО темылан статья-влакым лудаш темла. Шке кундемже да тушто илыше еҥ-влак нерген каласкала. Газет - тиде увер-влак гына огыл, а кундемын историй-же, чонжо да тукым ден тукымым ушышо кыл.

Редактор, корреспондент, водитель… Газетым лукмаш - тӱшка паша. А лудшыжо-влак кажне кугарнян яллашке миен шумыжым вучат. Тудлан возалтше да лудшо-влак улыт гын, тугеже ончыкыжат илаш тӱҥалеш.