Кече «шупшалме» еҥ-влак

Арава коваштыште пигментаций кайымылан кӧра «шочеш». Организм ойыртемалтше «меланин» пигментым луктеш, тудо коваштым утларак шемемда да ультрафиолет кечыйолын осал вийже деч арала. Меланин шагалрак годым чыла коваштым леведаш пигмент ок сите. Ситыдыме верыште арава лектеш. Тиде шошым кечын вийже ешаралтме годым поснак чот палдырна. Но тудо нигунам йӧршеш огеш йом, иктаж шыже кыдалне шапалга да тыге телым эртара.

Икымше гана арава айдемын куд ияшрак улмыж годым палдырна. Нылле ийым эрталтымекше, ойыртемалтше чеверлыкшым йомдараш тӱҥалеш, маныт.

Араван чурий ик еҥлан келша, а весе тудым ӱмыржӧ мучко пытараш шонен, орланен коштеш. Тудым кораҥдаш але уке, кажне еҥ шке пала, но, очыни, наследственный реакцийым вашталташ шотлан ок тол. Да ты пале деч йӧршын утлашат ок лий. Тудым изишак «шылташ» косметолог врач дек мияш логалеш, уке гын Юмын пуымо чевер тӱсдам пужен кертыда.

Мыйын шонымаште, арава пырче пеш мотор! Тыгай чуриян еҥ-влакшат ойыртемалтше, шкешотан, кумылым савырен моштышо улыт. А эше пиалан улыт, вет нуным кече «шупшалын»!