Башкортостанын Правительствыже 2024 ийысе пашажым иктешлен

СВО-н салтакше-влаклан полшымаш. Башкирийыште нунылан 43 тӱрлӧ полышым пуат. Специальный военный операций кайыме верлаш чумыржо 146 гуманитарный конвойым  - 15 тӱжем тонн полышым - колтеныт. Военнослужащий-влакын отпускыш толмышт да мӧҥгеш пӧртылмышт годым 373 гана колонным  ужатен наҥгаеныт да конденыт. Республикыште пӧртылшӧ салтак-влаклан паша верым муаш, у пашалан туныкташ, реабилитаций шотышто полшат, «Герои Башкортостана» кадр программым илышыш шыҥдарат. 

Ял озанлык. Игече чӱчкыдын вашталте гынат, кундемысе ял озанлык пашаеҥ-влак сай шурно лектышым погеныт. Тидлан ял озанлык производитель-влаклан субсидийым пуымо, у техникым налме, сатуштым ужалаш йӧным ыштыме. Ме элыште кумысым да мӱй сатум ыштыме производство дене ончылно улына. Ушкал шылым ыштыме, тыгак имне да ушкал чот дене кокымшо, шӧрым лӱштен налме да тӱкан шолдыра вольыкым ашныме дене кумшо верым айлена. Шӧр сатум, ушкал, сӧсна шылым, сакырым, кушкыл ӱйым, пареҥгым, киярым да томатым Башкортостан шкаланже шке ситара. Эше вес кундемлашке да эллашке ужалашат сита. Кодший 41 элыш 349 миллион долларлан 660 тӱжем тонн утла сатум колтымо.         

Медицина. Башкортостанын здравоохраненийжылан кодший 110 млрд теҥге утла шийвундым пуэныт. Тиде оксалан у ФАП-ым, поликлиника ден больница-влакым чоҥат, ачалат, оборудованийым налыт. Республика 206 санитарный машинам налын. Селаш пашам ышташ мийыше 270 утла медиклан чумыржо 280 миллион теҥге компенсацийым тӱленыт. Кӱкшӧ технологиян полышым пуымо пашам вияҥдат. Уфаште инсультлан мониторингым ыштыме рӱдер пашам ышташ тӱҥалын. Йоча онкологий да гематологий республикысе рӱдерын врачше-влак лу вемлан (костный мозг) операций-влакым ышташ тӱҥалыныт. Республикысе кардиологий рӱдерыште у хирургий корпусым почаш ямдылалтыт. 

Образований. Башкортостан школым, йочасадым чоҥымо да ачалыме федеральный программылаш ушнен. Республикыште идалык жапыште 1577 верлан ныл школым, начар тазалыкан икшыве-влаклан «Йондоз» образовательный рӱдерым почыныт, куд школым ачаленыт. Тений эше 35 школышто ачалыме пашам мучашлаш, 10 тӱжем утла верлан индеш школ зданийым чоҥаш палемденыт. Колледж-влакланат тӱткышым ойырат: кодший 15 зданийым капитально ачаленыт, эше шымытым уэмдаш шонат.

Регион-влак коклаште Уфаште эн ончыч Вуз-влак кокласе кампусым чоҥаш тӱҥалме, икымше ужашыжым почмо - тушто 18 лабораторий ден рӱдер пашам ыштат. 20 предприятий дене сай вашкылым ыштыме. Самырык ученый-влаклан полышым пуымо шотышто Башкортостан элыште икымше верым айла. Мемнан ныл университетна «Приоритет 2030» программыш логалын керте, нунылан миллиард теҥге полышым пуат. 

Корно-влак. Ме 1220 километр автотрассым шотыш кондышна. 26 кӱварым да путепроводым чоҥышна. Кодший «Восточный выезд» кугу инфраструктурный проектым мучашлышна. Татарстан чек гыч тӱҥалын, Дӧртыльӧ ола марте М12 трассын ужашыжым ыштен шуктымо. 40 километрыш шуйнышо Бирск-Тастуба-Сатка корным уэмдыме. 

Спорт. Башкортостан спорт шӱлышан регионлан шотлалтеш. Тыште спортын 141 видшым вияҥдат. Российын сборный командылашкыже республика гыч 429 спортсменым пуртеныт. Ик ийыште нуно 3,5 тӱжем утла медальым сеҥен налыныт. Спорт сооружений-влакын чотышт да нуным чоҥымо дене ме элыште ончыл верыште улына. Кодший кум объектым чоҥен шуктымо. Тиде Фехтований рӱдер, гребной слалом дене заниматлыме сооружений (Тушто таҥасымаш-влакым кеч-кунам эртараш лиеш) да Кучедалмаш рӱдер (Евразийыштат кугу рӱдер). 

Турист-влак. Кодший Башкортостаныште тӱвыра да историй объект-влакымат почмо. Тиде Торатау шихан воктене этнокомплекс, «Янган-тау» геопаркыште «Салауат ере» историй да мемориал комплекс, Чишма районышто «Тура-Хан» визит рӱдер. Пытартыш ныл ийыште республикыште глемпинг-влакын чотышт 5 гыч 120 марте шукемын. Турист инфраструктурым саемдыме паша теният шуйна.