Ава кумыл

Уло ош тӱняште ик Айдеме,

От вашталте тудым нигӧ ден. 

Кажнылан Ава - кава да Кече, 

Илышна кылдалтын тудын ден.  

Авалан кӧра тӱня волгалтын,

Тукым икте-весым вашталта.

Мландылан пӧрдаш - 

                                пӱтынь сандалык,  

Илышлан шуйнаш тек - курымла. 

Ме кугемына ава шӧр дене:

Илыше вӱд - пеҥгыдем кушкаш.

Вартыш вӱрышкӧ шыҥен куатле - 

Аван кумыл ден йӧратымаш.

Шочшыж верч ава ок шотло жапшым,

Мо кӱлеш, чыла шукташ тырша.

Икшыве улеш аван шӱм катыш,

Тек ок торло, шӱм пелен ила.

Лач аван йӧратымаш эн шерге,

Тудын вийже тыйын илышлан.

Саклыза авам, ила тек шуко,

Лийыда тунам эн пиалан!