Башкирийыште грипп талешна

Кызытеш школ-влакым тичмашнек карантиныш огыт колто, профилактикым гына эртарат: температур режимым эскерат, пӧлем-влакым южтарат да дезинфицироватлат. Школышто жаплан туныктымым чарныме нерген пунчалым директор луктеш. ОРВИ-лан кӧра 20% йоча тунемаш коштын огеш керт гын, карантиным увертараш лиеш.

Лабораторийлаште шымлыме гыч коеш, черланыше-влак кокла гыч 50% еҥжын тазалыкшым гриппын вирусшо лунчыртен. Тений тудын H1N1 подтипше, сӧсна грипп шарлен. Туддеч аралалташ профилактика полшен кертеш. Тидлан чер шарлыме деч кок-кум тылзе ончыч прививкым ыштен шуктыман.

Сӧсна грипп мландӱмбалне шукертак уло гынат, вийжым йомдарен огыл. Ты вирус ик еҥ деч весе дек пеш писын кусна, тудден нелын черланаш лиеш. Кугурак ийготан еҥ, нелашан ӱдырамаш да хронический шӱм, шодо, верге, эндокринный системе черан еҥ-влаклан поснак тӱткӧ лийман, кок ийым темыдыме икшыве-влакымат аралыман.

COVID-19 тений изиш вийжым йомдарен, ончычсо гаяк лӱдыкшӧ огыл. Но аралалтшаш тӱшкаш пурышо еҥ-влакым садак чот лунчыртен кертеш, садлан, черланымым шижмек, вигак врач дек кайыман.

Вирус нерген ойлымо годым, грипп гына огыл, моло инфекцият пижын кертмым мондыман огыл. Кызыт республикыште тыгак шоло инфекций, кызамык, йошкарчер вашлиялтыт, маныт инфекционист-влак. Ковид але сӧсна грипп дене черланымым врач-влакат тӱжвач ончалын гына каласен огыт керт, тидым лабораторийыште ыштыме анализ дене гына рашемдаш лиеш. Врач дек жапыштыже миеда гын, вашкерак раш диагнозым шындат да эмлаш тӱҥалыт.

ОРВИ дене черланыме гай чучеш гын, нигуш ида кай, врачым мӧҥгыда ӱжыктыза. Тыге вашкеракат тӧрланеда, черымат шаркален огыда кошт. Посна атышӧр дене пайдаланыза. Лийме семын ешысе моло еҥ деч ӧрдыжтырак але посна пӧлемыште лияш тыршыза. Черлым илалше еҥ але нелашан ӱдырамаш ончышаш огытыл. Ешысе чыла еҥланат маске дене коштман, кидым чӱчкыдынрак мушман да пӧлемым южтарыман.