Банк картым муында гын…

Банкоматыште муында гын

Ида тӱкале. Озаже монден кодымо картым банкомат шке «поген налеш». А экраныштыже мӧҥгешла шотлымым ужына. Картым окса дене пырля инкассатор-влак луктын налыт, озажлан йыҥгыртат да пӧртылтат але, озаже вес картым заказатлен шуктен гын, тудым шӱкыш савырат.

Уремыште муында гын

Закон почеш йомдарыме арверым мушо еҥ тидын нерген озажлан але ответственный еҥлан шижтарышаш (РФ Гражданский кодексын 227-ше статьяже). Картын шеҥгел велныже возымо телефон номер дене банкыш йыҥгыртен, кӧ улмым да картым мумо нерген каласыман. Банк озажым мушаш да, чынак картым йомдарен гын, тудым блокироватлышаш. Тылеч вара мумо картым тодышт шолаш лиеш - тудым локтылмылан мутым кучаш ок логал.

Полицийыш кайыза

Банк картым мумо нерген увертарымыдам шотыш налын огыл гын, тудым полицийыш намиен пуаш лиеш. Черетым вучаш да йодмашым возаш, тушан кушто да кузе картым мумым ончыкташ ямде лийза. Тулеч вара полиций пашаеҥ-влак картым аралаш налын кодышаш улыт.

Озажым шке ида кычал

Картын озажым тушан возымо лӱм почеш муаш ида тырше. Иктаж-кӧ тудден пайдаланен да оксажым налын шуктен гын, тыланда йолам ыштен, а эше титаклыме еҥыш савырен кертыт.

Ондалкалыше-влакын вапшышкыштат логалаш лиеш. Южышт лӱмын картыштым «йомдарат», а тудым мушо еҥ деч ончыч тушто шукырак лийше оксаштым пӧртылташ йодын, уке гын, полицийыш шижтарыме дене лӱдыктылаш тӱҥал кертыт.

Картын фотографийжым ида савыкте

Южгунам еҥ-влак оласе сообществылаште, соцкыллаште, пӧртын чатыштыже иктаж арверым мумышт нерген возат, фотожымат ончыктат. Банк картым мумо годым озажым тыге кычалаш огыт темле. Озажым ондалаш, тушто улшо оксам шолышташ картын ончыл вел сӱретшым ончыктымат сита. Тидын нерген соцкылыште возеда гын, озаже олмеш осалым шонышо, картын данныйжым пален налаш шонышо еҥ-влакат йыҥгыртен кертыт.

Еҥын картыж дене тӱлаш гын…

Еҥын картыж дене озажын разрешенийже деч посна тӱлымым шолыштмылан шотлат (РФ Уголовный кодексын 158-ше статьяже). Озаже полиций пӧлкаш йодмашым возен гын, банк выписка почеш тудден кушто тӱлымым рашемда. А кевытлаште да банкоматлаште улшо видеокамер-влак гыч кӧ тӱлымымат муаш неле огыл. Тидлан 100-500 тӱжем теҥге штрафым тӱлыктен але куд ий мартелан эрык деч посна коден кертыт.