Тыштат Шорыкйол, туштат…

Кушто клуб уло гын, тусо пашаеҥ-влак шкеныштын кӱшыл тӧраштлан ончыкташ манын, икмыняр еҥым ӱжын, лектын савырнат да фотоотчетым колтат. «Современный Шорыкйол», - малда южиктыже. Тыгайым, Кӧкыш ялышкем миен, ужын-колын тольым. Мишкан да Бирск могырныла тиддеч ик арня ончыч, Марий Элысе крешын марий-влакын жапышт дене келыштарен, клуб пашаеҥ-влак эртарен колтеныт. Ынде теве Калтаса районысо ялыш моло верла гыч погынен толыныт. Уна тӧра-влак уремыште ыштен шогалтыме сцена гыч тыгай пайремым эстафета семын ыштена манын умылтарышт. Вес ийлан вес вере погынен каяш шонат. А молан, марий йӱлам арален кодымо нерген ойлаш гын, шке илыме ялыште, районышто кажныже ожнысо гай огеш эртаре? 

Тыгеракын, кӧкыш-влак Шорыкйолым Тошто У ий (14 январь) деч ончычсо изарнян тарватеныт, а шуйна тудо ик арня. Можыч, вес изарня гыч Краснокам районыш куснена? Вара Дӧртыльӧ, Илиш вел марий-влак деке каена. Ончет, теле мучко Шорыкйолым шуяш да мурен-куштен кошташ лиеш. 

Урем покшелне сцена… Шорыкйол годым? Ӧраш веле кодеш. Ну эше толшо тӧра-влакым иктаж кудыш пуртен луктыт да Шорыкйол нерген мом-гынат кӱчыкын каласкален пуат. Мо ужам, эре ик тӱшка кажне ийын пайремлаш палемдыме (эстафета) верыш коштеш. Сценарият, кеч Шорыкйол, Ӱярня, Семык лийже, - эре икгай: сцена, тӧра-влакын саламлыме мутышт, вара мурымаш-куштымаш. Пайремын лӱмжӧ гына весе. Ик ялышке миен чумыргат да... Толшо коллектив-влаклан Шорыкйол дене кылдалтше номерым але тудын поян йӱлаж гыч иктаж ужашым ончыктыман ыле дыр, концертым кеч-кунамат ышташ лиеш… А шке районласе яллаште молан огыт тарвате? Амалже могай?  Тидын нерген Благовещенск район гыч толшо-влак деч йодым. «Ме олаште илена вет, тушто кузе эртарет», - маньыч. Кузе? Теве тыгак, «Современный Шорыкйол» семынак: сценым ыштен шогалтет да мурет-куштет… Олаштат ончыкташ лиеш. «А районыштыда? - умбакыже палымем шуэш. - Те вет Благовещенск олан гына огыл, районысо марий культурный автономий мер организацийын представительже улыда? Туштат марий ял-влак улыт, Изяк, мутлан…» Тыгай йодышем дене ӧрыктарышым чай. «А кӧ тушто эртараш тӱҥалеш?» - вашмут олмеш шкежат йодышым веле кольым. Конешне, лучо моло вере, ямде пайремыш, кошташ…Тыге сайрак.

Калык  ятыр погынен ыле, утларакшым толшо-влак - Кӧкыш ялысе деч ала-мыняр пачаш шукырак… Но мемнан марий-влакын унам  вашлийын, сийлен моштымышт эре сай кӱкшытыштӧ лийын да умбакыжат тыгай поро койышна ок йом, шонем. Кӧкыш ялыште гына огыл, моло вереат. Ты ганат землякем-влак пайремлан кӱлеш семынак ямдылалтыныт. Туштак, клуб ваштареш погынымо верыште, тул ӱмбалне кечыше под гыч тутло кочкыш пуш, уна-влакым авалтен, йырым-йыр пушланен.

Но поснак школышто тунемше Кӧкышысӧ йоча-влакын «Пеледыш» ансамбльышт куандарыш. Молан, шонеда? Сценым пеледыш алан гай сӧрастарыше, лывырге кап-кылан, мотор тувыран пачката ӱдыр-рвезе-влак мурен-куштымо мастарлыкышт дене гына огыл сымыстарышт. Тӱҥ шотышто кугу ийготан илалше-влакын коллективышт коклаште нуно ончыкылык ӱшан семын волгалтшыла койыч. Моло самырык-влакым шым уж. Тугеже, тыште йоча-влак дене пашам ыштат (ансамбльын вуйлатышыже Олеся Кугубаева), мыняр-гынат калык йӱла дене палдарен, тудын шӱлышыжым шыҥдарен куштат. А Шорыкйолым моло районлаште илыше марий-влаклан Кӧкышыштӧ ышташ шӱдымым землякем-влак чап дене шуктеныт да кугезына-влакын пуэн кодымо сугыньыштым суленыт, шонем.