Шорыкйол пӱкш

Тудым ямдылаш 3 стакан кӱшыл сорт ложаш, 5 муно, 1,5 стакан леве вӱд, 1,5 стакан йӱштӧ вӱд, 1,5 литр кушкыл ӱй, 0,5 изи совла кочмо сода, чывыштыш шинчал кӱлыт. 

Муным, руаш ыштыме атыш чӱчен, шоҥ лекмеш лугена. Варажым содым, шинчалым ешарен лугена. Ложашым пыштен, кидеш пижмым чарнымешкыже (ок сите гын, эше ложашым шавалтыман), руашым нӧштылына. Руаш яча, подкогыльылан ямдылыме гай, лийшаш. Вара тудым полиэтилен пакетыш 15 минутлан «каналташ» пыштена (шартше шужо).

Руаш гыч эгерче гайым ыштен пӱчкедена (иктаж 5 см кугытан шарик гай). Нуным кужу 1 см кӱжгыт тоя гай ыштен шарена да кугу ушаҥаш пыштена. Ыштен пытарымеш, руашын ӱмбалже изиш кошка, садлан пӱчкедаш сайрак лиеш. Тиде «тоя-влакым» 1 см кутышан ыштен пӱчкедена. Ик вере она ушо, пижын кертыт. Кажне пӱкш посна лийшаш.

Чыла пӱчкеден пытарымеке, кугурак чойн атеш 1,5 л кушкыл ӱйым шолаш пуртена (рафинированный ӱй чотрак келша - шикшыже шагал). А ожно кушкыл ӱй шагал лиймылан кӧра шел ӱйым кучылтыныт. Ӱйын йӱштыж годымак тушко ик 1,5 стакан йӱштӧ вӱдым ешарена. Шолмыж годым ешарет гын, шыжалтеш, когаргаш лиеш.

Шолшо ӱйыш тушым пыштена, пудыратен-савыркален кӱктена. Тудо нӧлталалтеш, овара, чиялген моторемеш. Дуршлаг дене налын, ямдылыме атыш оптена. Артык ӱйжым погаш манын, ате пундашыш кагаз салфеткым шарена.

Пытартыш ийлаште руашым ыштыме годым (кӧ йӧрата) эше 1 изи совла сакырым да пел изи совла ванилиным ешарат. Тыгай туш дене чайым йӱаш тамле.