У ий деч мом вучеда?

Изи годым кочай Мишкан районысо Чорай участковый больницыште пашам ышта ыле. Тудо У ий пайремыште Йӱштӧ Кугыза, а мый лум пырче лийынна. Почеламутым ойлымемлан кочай вафльым кучыктыш. Мый тудын кагазшымат, лӱмжымат ом шарне. Но тунар тамлын чучын! Тулеч вара тыгай тамле вафльым кочкын омыл.

Кудымшо классыште тунемме годым Чорайыште шулдештарыме сатум ужалыше кевыт ыле. Тушеч ик ырлан синтетик мочылам налын, шкаланем парикым ыштышым. Чыган кува лийын, школ ёлкыш мийышым. Йышт гына чиен, нигӧн шинчашкыже логалде, спортзалыш каяш пошкудо Семниева Нина акай полшыш. Мыйым иктат, эсогыл туныктышо-влакат пален огытыл, шукышт ӧрыныт. Теве тыгай шарнымаш кодын.

Лудшо-влаклан шарныктен каласынем: кугарня водын, кугарнян кидпашам ышташ ок йӧрӧ, сандене «Чолман» газетым лудса. Таза лийза, шӱм-чоныштыда эре тыныс лийже.