Эшеат шукырак уверым вучена

2024-ше ий мыланна уданжак ыш эрте - илышыште вашлиялтше савыртыш-влаклан вуйым пуыде, кыртмен ончыко ошкылна, лудшына-влаклан тӱрлӧ материалым ямдылен шогышна. Газетнам поянракым да оҥайракым ышташ нештатный авторна-влакат чот полшышт. Пашаче еҥ да еш, событий-влак дене палдарыше, кугезе йӱлана, кундемнан историйже нерген каласкалыше материалыштым, илыш гыч налме историйыштым, мыскараштым лудшо-влак дене пырля меат куанен лудна. «Чолман» газетыш идалык мучко кӱрылтде возен шогышо автор-влак коклаште И. Петровым (Дӧртыльӧ район), Г. Ахметшинам (Шаран район), Ф. Байтуковым (Илиш район), Н. Минаевам (Мишкан район), Г. Айтиевым (Краснокам район), Д. Аплекаевам (Караидель район) посна палемдыме шуэш. Тыгак республикынан тӱрлӧ кундемлаштыже илыше Д. Алиева, С. Салиева, С. Тоймурзина, Т. Ирбулатова (Мишкан район), В. Зайцева, М. Япарова (Бирск район), З. Максимова (Калтаса район), Н. Кайниева, Л. Байрамова, С. Иванова (Нефтекамск ола) редакций дене пеҥгыде кылым кучышт. Автор-влакын ешышкышт у еҥ-влакын - Туймаза ола гыч И. Акурбаеван да Благовещенск район гыч Т. Айтуганован - ушнымыштат куандарыде огеш керт. Мишкан районын шочшыжо-влак, кызыт элым аралыше рвезе И. Кутлуметов (Игорь Изерге) да Бирск олаште илыше Т. Алпаева ончыкыжат сылнымут аланнам ойлымаш да почеламут-влак дене пойдараш тӱҥалыт манын ӱшанен кодына.

Эн изи йолташна, школышто тунемше ӱдыр-рвезе-влак дечат уверым эреак вучена, нӧргӧ йоча-влак шочмо йылмыланна шӱмаҥыт гын, калыкнат ок йом, марий йылме дене савыкталтше «Чолманынат» ӱмыржӧ кужурак лиеш манын шонена. Тений Дӧртыльӧ район Елтек, Искуш, Бирск район Кужнур школла гыч возышо тунемше-влакын туныктышышт ден лишыл еҥыштлан кугу тау! Ӱдыр-рвезе-влакын чоныштышт чӱкталтше волгыдо сескемым арален кодаш тыршыза, тек ончыкыжат газетыш возаш кумылышт огеш йом, уш-акылыштым пойдарен шогат,  таза лийыт.

Чумыр ончымаште «Чолман» газетнан журналист да нештатный автор-влакым ушышо усталык ешыже изижак огыл. Шушаш ийыште тӱшка вий дене газетнам эшеат пайдалыракым да оҥайракым ыштен кертына манын ӱшанен кодына. А газет ден лудшо-влак коклаште вашкыл лиеш гын, чонна поянрак лиеш, илышна йомартлынрак эрта. Чыладамат шушаш У ий дене!