У ий деч мом вучеда?

Таза лийын, икшывем, родо-шочшем, ял калыкем дене келшен, тӱҥалме паша-влакым мучашке шукташ у ийыште тек эре ыҥгайлык гына лийын шогыжо. Тек У ий кажне ешыш шуко куаным да пиалым конда!

Пайремым ешем дене вашлияш шонем. Ӱстел йыр погынен шинчын, икте-весым саламлаш, эртыше ийлан акым пуаш, у ийыште у шонымаш-влак дене палдараш жап да йӧн лиеш. Элнан президентше В.В. Путинын обращенийжым колыштмаш да икшыве, уныка-влак дене гимным шогал мурымаш йÿлашке савырнен. Тыгай годым Шочмо элна дене кугешныме кумыл чоным авалта. 

Кажне жапын шке ойыртемже. Мемнан изи годым, кодшо курымын 70-ше ийлаштыже,  у ий шÿлыш весе лийын. Кожыш сакалаш модышым шке ыштенна, кампет кагазым ончылгочак погаш тӱҥалынна. Тетрадь лаштыкым чиялтен, оҥго-влакым ыштенна да пӧртын ик мучашыж гыч весыж марте пижыктылынна. Ёлкышто чияш маскымат шке ямдыленна. А аванан кÿэшт шындыме мелнаже, перемечше, когыльыжо эн тамле лийыныт. Школышто утренник годым завучын приказым лудмыжо да сай тунеммылан, сай койышлан книгам кучыктымыжо ушеш келге кышам коден. Кажне У ий пайрем тыге эртен.

Газетым лудшо-влаклан пеҥгыде тазалыкым, вуй ÿмбалне яндар кавам, тыныс илышым тыланем. Марий улмыда дене кугешныза! Йылмынам, йÿланам пагалыза! Вет тудо кова-кочана-влакын арален да мыланна умбакыже шуяш пуэн кодымо поянлыкышт. Республика кÿкшытыштӧ лектын шогышо «Чолман» газетнан ÿмыржӧ кужу-кужу лийже! Газет пашаеҥ-влаклан у деч у сеҥымашым да икоян, марий шÿлышан шуко лудшым тыланем.