+14 °С
Облачно
Саман увер
23 Декабря 2024, 06:07
Шӱжарем дене кугешнем
Кок шочмо шӱжарем, Эльвира Николаевна Максимова (Пекинина), Марий Эл Республикыште Советский районысо Михайловка посёлкышто ила. Кылме тылзын 7 кечыштыже шочын. 55 ияш лӱмгечышкыже Пошкырт кундем гыч Кугу Келтей ялыште илыше родо-шочшыжо-влакым пагален ӱжӧ.
Еш архив гыч налме фото-влак.
Эльвиран йоча жапше Келтей ялыште эртыш. Школышто тунеммыж годымак почеламутым возаш кумылан ыле. Изинек кушташ-мураш, гармоньым шокташ йӧратыше ӱдыр, Келтей школым тунем лекмеке, Йошкар-Оласе культпросветучилищыште уш-акылым погыш. Паша корныжым Михайловкыште клуб пашаеҥ лийын тӱҥале. Пӱрымашыжымат тиде ялыште илыше рвезе дене кылдыш. Илыш - тиде тӧрсыр корно, кӱзыман да волыман. Чаманен каласаш возеш, Юра пелашыже ден Вова эргыже, илен шуктыде, ӱмыр лугыч лийыч. Ойго шкетын ок кошт, маныт. Ик жап гыч аваже черланыш. Эльвира шке порысыжым шуктыш - пытартыш илыме кечыже марте ончен, аважым поген пыштыш…
Илышым йӧратыше чолга ӱдырамашым нелылык сеҥен ыш керт. Тудо ондак Екатеринбургыш, вара Москваш да Санкт-Петербургыш пашаш кошто. Илен-толын, шке пыжашышкыже, Михайловкыш пӧртыльӧ да чонлан келшыше пашам муо. Кызыт тудым кок уныкаже куандарат. Сергей эргыж ден шешкыже Йошкар-Ола гыч толын коштыт, сурт кӧргысӧ да пакчасе сомыллан полшат.
Эльвира шӱжаремым эртыше юбилей пайремже дене «Чолман» газет гоч уло кумылын саламлем да тыгаяк чулым, йомартле да чолга лийын кодаш тыланем! Илышын тӧрсырлыкшым тӧрлатен илен моштымет дене кугешнем!
