Еш пайрем куаным да чон шокшым пӧлеклыш

Эн ончыч ятыр ий пырля илыше еш-влак нерген поро мут йоҥгыш. Акпарс гыч вате-марий Рима Давлетовна ден Анатолий Тимирбаевич Ахметшинмыт тений шӧртньӧ сӱаным эртарышт, 50 ий пырля келшен илат. Коктынат пашан ветеранже улыт, эрге ден ӱдырым ончен кугемденыт, вич уныкашт уло. Пайремыште тыгак ятыр ий пырля илыше Гульян ден Александр Асмаевмытым, Альфира ден Давлет Сабанаевмытым, Тамара ден Бикбай Атнакаевмытым, Светлана ден Сергей Акбердинмытым саламлышт. Акпарс ялсоветым вуйлатыше Р.Г. Ягудин, пеледыш аршашым, таумутан серышым да шарнаш кодшо пӧлекым кучыктышыжла, тыге каласыш: «Тендан ешда, ятыр ий келшен илымыда ял калыклан пример улыт. Икшывыда ден уныкада-влакын сеҥымашыштлан куанен, эше шуко ий илыза».   

Посна верым шуко икшыван еш-влаклан ойырышт. Акпарс гыч Тухватовмыт ден Шуматовмыт, Пекшаул гыч Курмакаевмыт, Усола гыч Атнагузинмыт да Ташмурзинмыт еш-влак тӱрлӧ конкурслаште вийыштым тергышт. Алена ден Виктор Тухватовмытын вич икшывышт гыч кок эргышт СВО-н участникше улыт. Лариса ден Сергей Атнагузинмытынат вич икшыве, кугу эргышт СВО-што улеш. Тыгак Алена ден Ирик Ташмурзинмыт вич икшывылан ава-ача улыт, кугу эргышт СВО-што служитла. Алена Султангареевнам, Лариса Мандияровнам да Алена Исламгалиевнам «Материнская слава» медаль дене наградитленыт. Эльза ден Владимир Курмакаевмытын кум эргышт, кокытшо военный корным ойырен налын. Олеся ден Александр Шуматовмыт кок эргым да ик ӱдырым куштат. Нунылан школ директор Г.Ф. Габдрахманова деч таумутым да пӧлекым налаш вучыдымо, но пешат куанле ыле. 

Концертыште Еммет ял гыч В. Галеев, тунемше-влак мастарын мурышт, куштышт, почеламутым лудыч. С. Атнагузин гармонь дене Шаран вел марий сем-влакым пӧлеклыш. Мураш йӧратыше 77 ияш Меҥайбика кокай верыштыже шинчен ыш керт, сылне сем почеш мураш да тавалташ лекте. 

Еш пайрем куаным да чон шокшым пӧлеклыш. Тудо келшен, икте-весылан полшен илымым, нелылыкым сеҥен, волгыдо ӱшан дене ончыко кайымым ончыктыш.