Кажне еҥлан ешыже эн шерге

Елена Дмитриевна Курмакаева - Шаран район Чопай ялын ӱдыржӧ. Шаран селаште 11 классым тунем пытарыше 17 ияш ӱдыр 1990 ийыште Акпарс школышто пионервожатыйлан ышташ тӱҥалын, а вара тӱҥалтыш класслам туныктен. Паша деч кӱрылтде, Йошкар-Оласе Марий кугыжаныш педагогический институтын филологий факультетышкыже тунемаш пурен, «Руш йылмым да литературым, марий йылмым да литературым туныктышо» специальностян дипломым налын пӧртылын. Чумыр паша стажше 34 ийыш погынен. Елена Дмитриевна ятыр ий Акпарс школышто руш йылмым да литературым туныкта, кумшо ий йоча-влакым шочмо йылмылан шӱмаҥда да эше школ директорын воспитаний шотышто алмаштышыже улеш. Шуко ий сайлымаш-влак годым Акпарс избирательный участкын председательжын сомылжым шукта, кок гана переписчик лийын. Районысо «Идалыкын туныктышыжо» конкурсышто вийжым терген. Сай пашажлан тудым шуко гана Чап грамот да таумутан серыш дене палемденыт. 

Школышто Елена Дмитриевна - кӱшыл категориян уста туныктышо, пагалыме еҥ гын, мӧҥгыштыжӧ - ныл икшыван ава, кова, йӧратыме пелаш да сай озавате. Сергей пелашыж дене ынде 31 ий ваш йӧратен, икте-весылан эҥертен, икойыш шуын илат. Ушнымеке, самырык еш кугу пӧртым чоҥен, эргым да кум ӱдырым пашам йӧраташ, чолга да поро лияш туныктен куштен.  

Игорь эргышт полицийыште ДПС инспектор улеш, Шаран селаште ила. 

Инна ӱдырышт ешыж дене Наратасты селаште ила, МЧС-ште оперативный дежурныйлан ышта.

Инга ӱдырышт аграрный университетын финанс факультетшым тунем лектын. Октябрьский олаште «Росгосстрах» страховой компанийыште корпоративный ужалымаш менеджерлан тырша.

Полина ӱдырышт Акпарс школышто 8-ше классыште тунемеш. Чыла сурт сомылым ыштен мошта. Вольыклан шӱман, ушкалым лӱшта. 

Курмакаевмыт еш шуко вольыкым ашна. «Те коктынат пашаш коштында. Тыгодым кум икшывым куштенда. Кузе сурт сомылымат ыштылын, вольыкымат ончен шуктенда?» манын йодмемлан суртоза Сергей Ульянович тыгерак вашештыш: «Мый совхоз улмо годым ятыр ий ферме вуйлатышылан ыштенам. Мӧҥгӧ гыч куд шагат эрдене, Лена пелашем шымытлан лектын каенна. Икшывына-влакым Гульдиган авам ончаш полшен. Полина ӱдырнам гына кугемден ыш керт, колен колтыш. Сурт сомыллан кугурак эргына полышкален. Школ гыч тунем толеш да вольыкым онча ыле». 

Сергей Ульянович лу ий «Фаворит» кресаньык-фермер озанлыкыште директорлан ыштен. Тушто 200 наре тӱкан шолдыра вольыкым ашненыт. С.У. Курмакаевым пашам сайын ыштымыжлан Башкортостанын Ял озанлык министерствыжын Чап грамотыжо,  Российын Ял озанлык министерствыжын таумутан серышыж дене суапландареныт.

Кызыт Сергей фермер улеш, индивидуальный предприниматель семын чыла документым шотыш конден. Озанлыкыштышт 20 вуй лӱштымӧ ушкалым, ӱшкыжым, презым, сӧснам, шорыкым, комбым, чывым ашнат. Тынар шуко вольыкым ончаш, пукшаш манын, мландым налыныт. Тушто шудым, шурным куштат. Профессийже дене шофёрат, трактористат улеш, кӱлеш техникыжат уло, садлан чыла сомылым шкеак ворандарен кертеш.

Сергей Ульянович икмыняр созыв район Советын депутатше лийын, кызыт Акпарс сельский поселенийын депутатше улеш, мер пашаште тыршымыжлан районышто шуко гана Чап кагаз дене палемденыт.

«Пелашем - моткоч чолга, пашаче, поро чонан, куштылго кид-йолан пӧръеҥ. Тудлан техника дене пашам ышташ келша, мо-кузежым чыла пала. Ынде мыят икмыняр ий машинам виктарем. Ты шотышто шукылан тудо туныктен», - ойла Лена пелашыже.

Шуко икшыван ешыште куанжат шукырак. Ача-авалан йокрокланаш жап уке, шке озанлыкыште сомыл нигунам ок пыте. Шуко икшыван ача-ава лияш - пеш кугу паша. Юмо икшывым пуа гын, куанен илыман. Елена Дмитриевнан мутшо почеш, шочшым ончен кушташ Юмо садак полша. Да шуко икшыван лияш лӱдын, ӧрын шогыман огыл. Пашам тыршен ыштет гын, улан илаш тӱҥалат.