Порсын кумылан ава-кова-влак

Мый Нерге ялыште илыше ӱдырамаш-влак нерген поро мутым каласен кодынем. Ялыштына эн шоҥго ава-кова, кугезе кова-влак - 93 ияш М. Андреева, 92 ияш Н. Николаева, 89 ияш О. Салишева, Н. Аликова, 81 ияш Е. Николаева. Нуно чылан шуко икшыван улыт, чылаштымат икшывышт онча. Ӱжмӧ годым кертшышт клубышто эртарыме пайремлашкат толыт, ожнысо илыш, Кугу Ачамланде сар жапыште кугурак-влаклан полшымышт нерген каласкалат.

70-80 ияш-влак коклаште шуко икшывым ончен куштышо-влак  Р. Ишпахтинам, М. Апкадыровам, Н. Изибаировам (6 йоча дене), С. Шаяхметовам, Н. Ялкаевам, О. Аликаевам (5 йоча дене) палемдынем. Л. Яникеева, Л. Захарова, Е. Байметова, В. Ишпахтина 4 икшыван улыт.

«Ӱжара» ансамбльыш коштшо-влакат ава-кова улыт. Нуно сурт сомылланат, мураш кошташат жапым муыт. Тиде Т. Байгазова, Л. Иванаева, О. Каншаева, В. Сайниева, М. Гареева, С. Каншаева, С. Яникеева, О. Ишпахтина, С. Валиева, И. Захарова.

Кызыт илыш вашталтын. Самырык ава-влаклан паша уке, но кушто-гынат пашам верешташ тыршат. Кажныже суртым куча, пакчасаскам ончен кушта, кызыт клубыш СВО-шко колташ сетьым пидаш коштыт, 20-30 еҥ денат погынат. Чылан илышна тыныс лийже ыле манын шонат, вет мемнан ял гычат ныл рвезе СВО-што улеш. Нунын верчат авашт-влак тургыжланат.