Илыш вий

Теве тачат, тышке толын, теҥгылыш шинче. Трук шинчажлан йолгорно ӧрдыжтӧ, куштыра коклаште, кийыше кинде курика койо. Чонжылан моткоч каньысырын чучо, вуйуш кайыме гаят лие…

Ленинград блокадын кокымшо ийже. Жап деч ончыч кугемше Агата колымаш да шужымаш нерген сайынак пален. Ала-кунам сылнын тӱзланен шогышо ола деч нимоат кодын огыл. Фашист бомбо йымаке йӧратыме садшат логалын. А вет шукерте огыл тудо тушто кечыйолым поктылын модын. Пошкудо рвезе ӱдырым антоновко олма дене чӱчкыдын сийлен. Кызыт тиде тӱтырала шулен йомын, лач шарнымашеш гына кодын. Агата кугыеҥ-влак дене иктӧрак кас еда пӧртвуйышто оролен - зажигательный бомбо-влакым йӧртылын.

«Зажигалке»! Ты мут йоча ушлан моткоч шучкын чучын. Агата тиде неле жапым, осалым, кава гыч велше тул йӱрым нигунамат огеш мондо. Ик тыгай зажигалке пошкудо рвезын йолжо йымак толын возын да, кишкыла чушлен, рвезе ӱмырым курымешлан наҥгаен. Ик арня наре Агата вакшыш гыч кынелде киен, икте денат кутырен огыл. А ик теле йӱдым трук ылыжын. Тидлан амалым тумбычкышто кийыше тыглай кинде шултыш ыштен. Ӱдыр кечыгут тудым ончен киен, самырык ушыж дене ала-мом шонкален…

Сар деч ончыч Агата Панкрат кочаж деке кеҥеж канышлан унала миен.

- Кочай, молан тый мланде илыш вийым пуа манат? - йодын тунам Агата.

- Мланде теҥыз гаяк. Тольык вӱд олмеш тудын шурно, кинде. А тушто пашам ыштыше еҥ-влак эҥер гай улыт. Нуно теҥызлан йомаш огыт пу. Кинде илыш вийым пуа…

Лач нине шомак-влак тунам Агатан ушыштыжо пӧрдыныт да умбакыже илаш вийым ешареныт. Вӱр дене варналтше, шужен орланыше Ленинград фашист ончылно вуйым савен огыл. Теве тыгай Агата гай лӱддымӧ да кугу кӧргӧ виян еҥ-влаклан кӧра чытен лектын.

Агата Сергеевна теҥгыл гыч пыкше кынеле да, кӱсенже гыч носовикым луктын, кудалтен кодымо кинде курикам тушко вӱдылале, ончыко ошкыл колтыш.