Юмо тӧрла

Шочмын да кушкыжмын уке улмаш, таче толшаш. Аваже нимомат возен огыл? Светлана Александровна, сумкаж гыч телефоным луктын, группын чатшым почо. «Поро эр. Тёман аллергийже вияҥын. Тиде арнян пӧртыштӧ лиеш», - лудо. «Могай тушто аллергий? Шошат, кеҥежат огыл. Аллергий огыл, а нерге возын, черланен. Кодшо арня тӱҥалтыштак ме медсестра дене ава-ачажлан шижтарышна: эргыдан нерже йога, чот ынже черлане манын, эмлалтса. Уке, эргыштым пӧртыштӧ эмлалташ ышт кодо. Рвезын аллергийже улмо нерген справкым кондышт. Кагазым налаш йӧсӧ мо? Аваже - врач, кызыт аза дене декрет отпускышто улеш. Ачаже шӧртньым лукшо организацийыште вахта йӧн дене пашам ышта. Тиде арня тӱҥале веле, кок кече почела «Тёма таче огеш мий, эрла толеш» манме сообщенийым колтышт. Температурыжо кӱзыш, очыни.  Вигак «Тёма черланен, пареммешкыже, йочасадыш огына намий» манаш кӱкшӧ кумыл торешым ышта?» - иканаште тынар шарнымаш ден шоныш ушышкыжо пурен-лектын кайышт. «Салам лийже. Эмлалтса, вашкерак паремза», - смс-ым колтыш. Мыняр сайрак лийже манын тыршет, садак тупела лектеш. Самырык-влак шкеныштым чынлан шотлаш йӧратат. Но кунам кугуракым от колышт, Юмо тӧрлаш тӱҥалеш.