Азам кузе лыпландараш?

Куд ияш эрге ден идалыкым эрталтыше ӱдырыштым кова-кочалан ончаш коденыт. Ончыч чыла сай улмаш: йоча-влак кочкыныт-йӱыныт, юарленыт, модыныт. Кум шагат гыч ӱдыр уныка нюслаш, вара шорташ тӱҥалын. Кузе лыпландараш? Кова-коча изи уныкашт воктеч кораҥынат огыт керт: икте-весыштым алмаштен, кидеш кучен рӱпшат, учик-учик лӱҥгалтыктат, тӱрлӧ модышым пуат, мультфильмым чӱктат - ниможат огеш полшо. Уныка вич минутлан лыпланыме гай лиеш да адак нюслен шорташ тӱҥалеш. Кенета ӱстел коклаште конструкторым поген шинчыше уныка коваж деч телефоным йодо. Вигак аваж дек видеозвонок дене йыҥгыртыш.

- Авай, те кунам толыда? Ӱдыретым ончал, - телефоным шӱжарже велке савырыш…

Коло минут гыч ава-ача толынат шуыч. Теве тыге йочам лыпландарат.