Шкенжын пашажым да икшыве-влакым йӧрата

Шукерте огыл Нефтекамск оласе 11-ше йочасадын воспитательже И.И. Михайлова сӧрал фотосӱретым ончыктыш. Тушто кугем шогалше ӱдыр-рвезе-влак йочасад воспитательышт деке унала мийымышт годым изишт годым ыштыме фотосо гаяк шинчын-шогалын, тунамсылак кидыштым кучен да вуйыштым савырал возалтыныт. Кок фотом таҥастараш путырак оҥай. А эше ончычсо воспитанник-влакын тынар ий гыч воспитательыштым шарналтымышт - кугу пагалымашым да пашажым аклымым ончыктышо моткоч шерге тат.

И.И. Михайлова образований пашаште нылле ий наре тырша. 1984 ийыште Благовещенск педучилищым тунем лекме деч вара тудым направлений почеш Краснокам районыш колтеныт. Ирина Илаевна ончыч Чапай тӱҥалтыш, вара Ӱлыл Такия кандашияш школлаште тӱҥалтыш классыш коштшо йоча-влакым туныктен. Нефтекамскыш илаш куснымек, 11-ше йочасадыште эшеат изирак падыраш-влак дене пашам ышташ тӱҥалын. 32 ий тынар писын эртымым шижаш лиеш мо, ала?

«Мыланем, йочасадыш кошташ гына тӱҥалше ньога-влакым группыш налын, нуным кугемден, ийготыштлан келшыше тӱрлӧ моштымашлан туныктен, школыш колташ келша. Ятыр ий ӱдыр-рвезе-влак дене марий йылме кружокымат намийышым. Кажне гана у тӱшка дене пашам ышташ тӱҥалме годым у книга лаштыкым савыралме гай чучеш: йоча-влакын койышт-шоктышыштым умылаш да эркын кӱлеш йогыныш виктараш, ача-ава-влак дене кылым ыштен мошташ кӱлеш. А вара шкежат нунын дек, нунат тый декет туге тунем шуыт, школыш ужатыме годым куанен да кугешнен гына огыл, коклан шинчавӱд денат чеверласет», - каласкала кӱшыл категориян воспитатель И. Михайлова.

Ирина Илаевна - творческий шӱлышан айдеме, йочасадысе мероприятийлаште рольым тунар устан модеш - южо йоча нунын ончык чынак йомакысе герой толын шогалын манын ӱшана. 11-ше йочасадыште кумло ий утла тыршыме жапыште тудлан Вувер-Кувашкат, Петрушкышкат савырнаш логалын, варажым, шке манмыжла, Йӱштӧ Кугыза мартеат «кушкын шуын». 

Пытартыш ийлаште оласе йочасадлаште коррекционный группа-влакым почаш тӱҥалыныт. Ирина Илаевнат ынде шымше ий тыгай группа дене пашам ышта. Тыште тӱҥ сомыллан социализаций йодышым шотлыман. Икшыве-влакын уш-акылыштым, тӱняумылымашыштым, шижмашыштым вияҥдаш, кидыштым лывырташ манын, сенсорика кружокымат вӱда. «Мыланем ты группын шукырак выпускникшын тыглай школыш тунемаш кайымыже - эн кугу куан», - чон почын каласыш Ирина Илаевна. Ойыртемалтше икшыве-влак дене пашам ыштыме йӧн-влакым сайынрак палаш манын, тудо шкенжын шинчымашыжымат пойдараш жапым муэш, ий еда гаяк тӱрлӧ он-лайн курсышто тунемеш, наставник семын самырык воспитатель-влакланат паша «тамым» шижаш, опытым погаш полша. Кужу жап тыршен ыштымыжлан И.И. Михайловам Нефтекамск ола администрацийын, Образований пӧлкан профкомжын Чап грамотышт дене палемденыт.

…Ий-влак эртыме семын ик тукымым весе алмашта, икшыве-влакат, ача-ава-влакат, туныктымо да воспитатлыме йӧн-влакат вашталтыт, тӱҥжӧ гына - педагогын икшывым йӧратымыже - тугаяк кодшаш. Йочам чот йӧратет да пагалет гын, чыла нелылыкым сеҥаш, пашашке шыҥдарыме у вашталтыш-влаклан тунем шуаш лиеш. А сай лектыш да икшыве-влакын ятыр ий гычат тыйым порын шарналтымышт - пашалан эн кугу ак.